Сумар дня 11. квітня/апріля 2023 р.

Приносиме вам сумар медияльной ґрупы ЛЕМ.фм+ на ден 11. квітня/апріля 2023 р.

«Народна культура і традиция» – серед выріжненых проєкты промуючы лемківску культуру

Міністерство Культуры і Нацийональной Спадковины оголосило результаты конкурсу «Народна культура і традиция». Цілю проґраму єст підперти діяня звязаны з промуваньом модерного смотріня на традицию. Дофінансуваня признаване єст в девятьох катеґориях, котры тыкают архівізациі, рыхтуваня домкументациі ци проґрамів охороны традициі, ведіня социяльных діянь, курсів, варштатів ци орґанізуваня акций звязаных з популяризацийом культуры. Остатня катеґория – «Мастер традициі», посвячена єст фінансуваню школінь веденых мастерами конкретного фаху, котры в тот спосіб переказуют своє знаня наступным поколіням. В ґрупі выріжненых нашли ся тіж бенефіциєнты з Лемковины і тоты промуючы лемківску культуру, м.ін. Ґмінный Осередок Культуры в Команчы з проєктом посвяченым Карпатскым традициям, Музей Дворы Карвациянів і Ґладышів з проєктом «Село заникаючых професий і здібности», Ґорлицкій Осередок Культуры і проєкт «Погіряньско-лемківска коломыя», Товариство для Розвитку Музею Лемківской Культуры в Зиндрановій і дві задачы: стрічы «Од Русаль до Яна» і «Лемківскій Культуральный Форум». Дофінансуваня достала тіж Кычера на орґанізацию Фестівалю «Світ під Кычером» і проєкту «Лемковино краю рідный. Документация, архівізация і удоступніня лемківской культуры». Фінансову підпору  отримали тіж православна парохія в Любіні на реализацию проєкту «Стріча з Лемківском Культуром» і Підкарпатскій Фонд Розвитку Культуры на «Перегляд Кресовой Творчости Бойків і Лемків».

«Ікона на новый вік – медже традицийом а аванґардом»

В найблизшу суботу 15. квітня/апріля в палаци Потоцкых в Кракові пройде стріча пн. «Ікона на новый вік – медже традицийом а аванґардом» посвячена Юрийови Новосільскому. Выклад проведе Кристина Черні і буде ся він складал з теоретичной части і презентациі найцікавшых реализаций Новосільского. Як мож прочытати в описі стрічы – сакральна творчіст Новосільского то джерело інспіраций, за каждым разом при інтерпретациі мож найти дашто нове. Стріча зачне ся о 18.00 год.

«Церкви і іконы Лемковины» новый наклад уж доступный

Выдавництво Libra поінформувало, што рушыла передпродаж нового накладу книжкы «Церкви і іконы Лемковины». То уж третій додрук альбому авторства Ярослава Ґємзы. Нове выданя єст пошырене о додатковый розділ посвяченый найновшым досліджыням і подіям звязаным з парома церквами на Лемковині, м.ін. з обєктами з Ґладышова ци Нижньой Мохначкы. Уж тепер нове выданя мож купити в передпродажы, а кінцьом квітня/апріля книжка вкаже ся в книгарнях.

Про початкы Лемковины на стрічы з проф. др. габ. Михалом Парчевскым

Карпатскє Товариство просит до участи в третій в тым році «Віртуальній Карпатскій Стрічы». Подія пн. «Початкы Лемковины – факты і міты» пройде 13. квітня/апріля, а вюл ю буде проф. др габ. Михал Парчевскій, археолоґ специялизуючый ся в початках славяньской культуры в Польщы та вчасносередвічным осадництві в Карпатах. Выклад зосередит ся на анализі найновшых археолоґічных і історичных даных та дискусиі з даякыма теориями о заселяню Карпат. Стріча зачне ся о 19.00 год. і як все трансмісию мож буде обзерати на каналі YouTube Карпатского Товариства. Кєд дахто хоче взяти активну участ в дискусиі, єст тіж можливіст брати участ через плятформу ZOOM, при чым скорше треба ся зголосити до орґанізаторів.