Сумар дня 22. квітня/апріля 2024 р

Приносиме вам сумар медияльной ґрупы ЛЕМ.фм+ на ден 22. квітня/апріля 2024 р.

Х Конґрес Стоваришыня Лемків

В суботу, 20. квітня/апріля, в Ліґници одбыл ся Х Конґрес Стоваришыня Лемків. Зышол ся він з 35. річницьом основаня той першой повоєнной лемківской орґанізациі. Як найвысша статутова власт Стоваришыня – рішыл м.ін. о абсолюториі для уступуючого правліня, а так само в його рамках выбраны были ведучый Стоваришыня і новы члены Головного Заряду та Головной Ревізийной Комісиі. На предсідателя Стоваришыня Лемків черговый раз был выбраный Андрий Копча. Конґрес рішат м.ін. о плянах на дальшу каденцию, в тым о пріоритетах, котры треба реализувати в соспільно-політичній діяльности Лемків в Польщы.

Варштаты батканя яєц в Рускій Бурсі

Уж в тым тыжни, 28. квітня/апріля, в Квітну Неділю за старым календарьом, в Рускій Бурсі в Ґорлицях одбудут ся варштаты батканя яєц. Занятя зачнут ся о 15.00 год. Вступне дармо. Забезпечаме тіж материялы – будут на Вас чекати: зварены яйця, фарбы і воск до малюваня. То чергова подія, котра проходит в рамках Творчой Бібліотекы – циклю стріч для діти і молодежы, вчас котрых рыхтуваны будут розмаіты ручной роботы артефакты. Сердечно просиме!

Віртуальна премєра танцювального фільму «Мамко моя Люба!»

Doma Dance Theater і Карпаторусиньскє Общество зо Зъєднаных Штатів Америкы просят на віртуальну премєру найновшого твору театру, танцювального фільму пн. «Мамко моя Люба!». Образ вказює дві жены гуляючы в поли, іх танец операт ся на кроках фолькльорного і модерного танця. Презентуют облечыня, котре лучыт в собі елементы жіночого крою з окресу Меджелабірці. По проєкциі пройде дискусия з продуцентком і хореоґрафком Александром Боднарчук та почестным председом Карпаторусиньского Общества Джоном Ріґетті о будучности карпаторусиньского танця. Подія пройдр на плятформі ZOOM 16. мая о год. 18.30 центральноамериканьского часу.

«Політичный аспект представлінь святых Кірила і Методия в ґалицийскых церквах»

Східньоевропейска Комісия Польской Академіі Знань просит на наукове засіданя. Выклад пн. «Політичный аспект представлінь святых Кірила і Методия в ґалицийскых церквах» выголосит др габ. Аґнєшка Ґронек, проф. Ягайлоньского Університету. Засіданя проходит днес, 22. квітня/апріля од 17.00 год в просторах Польской Академіі Знань в Кракові. В подіі мож взяти участ стацийонарно або онляйн на плятформі ZOOM.

В Польковицях прошла соспільна акция прятаня ліса

Як припомнула ґміна Польковці, 22. квітня/апріля святкує ся Медженародный Ден Землі. Тота шторічна подія має на ціли промувати охорону середовиска, пошырювати еколоґічну свідоміст і жытя в згоді з натуром. З той нагоды практично цілый місяц орґанізуваны сут ріжны подіі, што промуют проеколоґічны діяня. Примірно прошла в тым місяци акция прятаня польковицкой стежкы здоровля, в котрій взяло участ понад 80 осіб. Того рода соспільны діяня сут реализуваны в ґміні од вельох років.