Сумар дня 22. марця 2023 р.

Приносиме вам сумар медияльной ґрупы ЛЕМ.фм+ на ден 22. марця 2023 р.

Остан вольонтером при орґанізациі Світового Конґресу Русинів

Як подає аґенция Рутенпрес, днес о 18.00 год. проходит стріча орґанізацийного комітету 17. Світового Конґресу Русинів. Одбуде ся она в Рускым Культурным Центрі в Новым Саді. Конґрес проходит што два рокы в ріжных державах, в котрых діют членьскы орґанізациі. Тогорічну едицию Конґресу орґанізує Руска Матка з проф. Михайлом Фейсом на челі. Конґрес одбуде ся в днях од 17. до 19. серпня/авґуста. Орґанізаторы просят вшыткых, котры хотіли бы помочы при орґанізациі, жебы зголосили ся на стрічу в Культурным Центрі в Новым Саді, мож тіж контактувати ся безпосередньо з председом Руской Маткы на адрес fejsam@gmail.com.

Хто бы хотіл студиювати русиністику?

Остаєме при Бачваньскій Руси – в суботу 25. марця од 10. до 13. год. на Філозофічным Факультеті Університету в Новым Саді будут проходити Дни Одкртитых Двери. На тот ден прошены сут вшыткы середньошкільны ученикы, котры хотіли бы познати єден з проґрамів до студиюваня на Філозофічным Выділі – русиністикы. Того дня буде мож ся дознати як зрыхтувати ся до вступных еґзамінів, де мож найти роботу по скінченій науці, буде тіж простор до задаваня дальшых звідань – присутны будут теперішні студенты русиністикы, котры зо свого досвідчыня будут мочы поділити ся заувагами і радами.

Діти в Лоси і в Ропі будут мати полновыміровы спортовы галі

Ґміна Ропа підписала 17. марця два догваріня з зовнішньом фірмом Антекс на запроєктуваня і будову спортовых галь на обшыри ґміны. Будинкы вознесут в Ропі, при Основній Школі но 2 та при Шкільно-Предшкільным Комплексі в Лоси. Обєкты будут складати ся зо споротвой части, резервных помішынь та лучника з істнуючыма будинками, при котрых іх вознесут. Простір обох галь то коло 750 квадратных метрів, а выміры спортовых саль то 12 х 24 м – найдут ся на них вельофункцийне боіско – до гры в волейболь, баскетболь і футболь. Обєкты выпосажены будут в електронну таблицю результатів, систем наголосніня, акустичну ізоляцию, а будут тіж доступны для осіб з неполносправностями. В Ропі галю мают побудувати до кінця 2025, а в Лоси – до кінця 2026 рока.

Задбана лемківска спадковина

Воєвідскій Консерватор Памятників Підкарпатского Воєвідства оголосил список дотаций признаных на 2023 рік на сфінансуваня ремонтово-консерваторскых робіт при памятниках, што находят ся на обшыри того воєвідства. Разом до уряду вплынуло 349 внесків, з чого признали 214 дотаций на ремонт рухомых і нерухомых памятників вписаных до державного реґістру памятників. Завдякы фінансуваню проведут ремонтовы роботы при церкви в Завадці Рыманівскій, прицерковній дзвінници в Радошыцях, буде ремонтуваный дах і шалюнок стін олтаря церкви в Перегримці, зроблят консервациі: іконостасту в цервки в Туряньску, єдной з ікон і феретрону в церкви в Святківці, а тіж жертвенника і запрестольного олтаря в церкви в Щавным. Одкрывковы баданя при поліхроміі і забезпечаючы роботы при іконостасі зроблят завдякы дотациі тіж в церкви в Смільнику.