Сумар дня 29. марця 2023 р.

Приносиме вам сумар медияльной ґрупы ЛЕМ.фм+ на ден 29. марця 2023 р.

Початкы Мідьового Басену

В пятницю 24. марця в Сєрошовицях під Польковицями прошло дорічне торжество упамятніня одкрытя єдного з найвекшых родовиск міди. Стрітили ся копальникы, самоурядовці, ученикы шкіл та представникы стоваришынь і орґанізаций. 66 років тому під Сєрошовицями ґрупа польскых ґеолоґів під кєрунком др. Яна Выжыковского першый раз удокументувала істнуваня величезных покладів руды міди. Тоту подію узнают за символичны народины Мідьового Басену. Од парудесятъох років під обелиском упамятняючым тоту історичну подію стрічают ся представникы копальняной соспільности, локальных власти і місцевого населіня. Присутный на подіі бургомайстер Польковиц Лукаш Пузнєцкій підкрислил, што в тым місци зачала ся друга істория Мідьового Басену і друга істория Польковиц і што економічный розвиток той обшыри не был бы можливый без посвячыня вельох поколінь копальників.

Розпочали упамятніня 220. річниці народин велького будителя Русинів

На Малій Сцені Театру А. Духновича в Пряшові прошла в понедільок перша публична бесіда про найвекшого русиньского будителя, покровителя театру, Александра Духновича. Подія, котру заініциювал Округлый Стіл Русинів Словациі вєдно з радийом Русин.ФМ, одкрыла серию подій посвяченых будительови, в звязку з 220. річницьом народин, яка пройде в квітни/апріли. На тему «Жытя А. Духновича» дискутували Валерий Падяк з Інституту Русиньского Языка і Культуры Пряшівского Університету та грекокатолицкій священник Мілян Ясик, член Общества святого Йоана Крестителя. Бесіду модерувал Ладислав Ясик, педаґоґ та редактор радия Русин.ФМ. Дискусия вказала образ Духновича як священника, писателя і народного будителя, але і підкрислено, якє влияня мал Духнович на тото, же Русины нашли ся медже самобытныма, еманципуваныма народами. Запис бесіды мож найти на каналі Youtube Округлого Стола Русинів Словациі.

Епіфана Дровняка будут обзерати в Іспаніі

Уж заран в Реґіональній Бібліотеці Мурсиі в Іспаніі пройде вернісаж выставы малярства двох артистів, што творили в нурті примітивізму – Никыфора та Мариі Примаченко. Вказуваны будут разом 22 роботы, по 11 од каждого з артистів. Творчіст Мариі Примаченко міцно навязує до украіньского фольклору, артистка хоснувала фаребну стилистику, малювала незвыклы рослины і істоты. Єй творчіст подабала ся аж і Пабльови Пікассо. Подібні як Примаченко і Никыфор хоснувал малюваня до комунікациі зо світом. Епіфан Дровняк узнаваный є за єдного з найважнійшых артистів наівной штукы на світі. Спілорґанізатором выставы є польскій консулят в Мурсиі та Польскій Інститут Культуры. Подія зорґанізувана є для угоноруваня односин медже польском державом а украіньском, котра терпит з причыны росийской інвазиі. В першых днях атаку росийскє войско знищыло Краєзнавчый і Історичный Музей в Іванкові, в котрого колекциі находило ся 25 образів Мариі Примаченко. Вернісажови товаришыл буде музичный выступ з композициями Вітольда Лютославского.

Просиме на малюваня яєц!

По перерві спричыненій пандемійом, Руска Бурса вертат до спільного прикрашаня великоднiх писанок. Тогорічны варштаты батканя яєц заплянувано на 2. квітня/апріля 2023 р. Вшыткы охочы прикрасити яйця на Великден будут мати таку нагоду – стріча пройде так перед Великодньом празднуваным подля григорияньского, як і юлияньского календарів. Вчас спільной стрічы продолжана буде традиция рыхтуваня великодніх писанок батіковом методом – розтопленый воск наносит ся на верхню верству яйця, хоснуючы метальовый писалец з головком. Участ є безплатна, забезпечены будут фарбы, воск, шпилькы. Зо собом треба принести яйця – найліпше, жебы уж были поварены.