Сумар дня на 17. червця/юнія 2026 р.

Приносиме вам сумар медияльной ґрупы ЛЕМ.фм+ на ден 17. червця/юнія 2026 р.

Аж 135 участників фіналу декляматорского конкурсу Духновичів Пряшів!

В понедільок одбыла ся ювілейна 25. едиция конкурсу деклямациі поезиі, прозы, народного розповіданя, авторской творчости і малых сценічных форм – Духновичів Пряшів 2026. Орґанізатором подіі є Русиньска Оброда на Словациі. Фінал конкурсу, котрый прошол в Пряшові в просторах Театру А. Духновича, опередили реґіональны переслуханя. Модераторком тогорічного фіналу была Зденка Кваскова, акторка русиньского театру. Тогорічне жырі, в складі: акторы Осиф Пантликаш (председа) і Данєля Либезнюк, дослідникы з Інституту Русиньского Языка і Культуры Михал Павлич, Домініка Новотна та бывшый актор Ігор Латта, рішыли, што лавреатком Духновичового Пряшова 2026 остала Юлияна Карашова з Камюнкы. Вшыткых участных было рекордовых 135 осіб, якы презентували ся подля пятьох катеґорий, подля окремых жанрів. Список вшыткых нагородженых найдете в дописі на нашым портали.

В Барцелоні одбыват ся Форум Языковой Ріжнорідности

Од днес до суботы в Барцелоні одбыват ся Форум Языковой Ріжнорідности – Language Diversity Forum. Медженародна подія посвячена языковій ріжнорідности, орґанізуваня через стоваришыня Linguapax і проєкт FOSTERLANG. Подія громадит експертів, активістів і представників соспільности з цілого світа, жебы дискутувати о явыковых правах, ревітализациі языків і о выкликах, якы звязаны сут з міґрацийом і культурном ріжнорідністю. В проґрамі заплянувано панелі, дебаты, варштаты і нетворкінґовы стрічы, а тіж сесиі, што посвячены языковій політиці, едукациі і соспільній інтеґрациі. Участникы возмут участ м.ін. в дискусиях о языковій справедливости, діянях для охороны загыбаючых языків і практичных школінях для активістів. Подіі товаришыт выстава Languages do not die, they are killed на Уніерситеті в Барцелоні та концерт каталоньско-сардиньской музикы.

Ватра в Малым Липнику – богатый проґрам головных і додатковых подій, неповторна локалізация і атмосфера

Ювілейна, 15. едиция фестівалю Русиньска Ватра, одбуде ся в днях од 10. до 12. липця/юлия в Малым Липнику над Попрадом. В проґрамі находят ся концерты русиньскых ансамблів, выступы дітячых фольклористичных ґруп і богатый проґрам додатковых подій – в тым артистичны варштаты, школа танця, реґіональна кухня і показы. Пятницю вечер звіздом буде фолькрапова ґрупа Calibri Gang. Як все, одбуде ся спільне розпаліня ватры, а новістю буде пленерове кіно, котре заінавґурує імпрезу. В четвер 9. липця/юлия одбуде ся промітаня фільму «Потопа», на показі присутны будут і продуценты фільму.

Посвяткуйте з нами!

Наше радийо святкує того рока 15-літя свойой діяльности. На символичне святкуваня запрашаме на суботу 4. липця/юлия. Проґрам зачне ся о год. 11.30 богослужыньом на Святій Горі Явір в памят Боґдана Ґамбаля, думкодавці і основателя ЛЕМ.фм, а так само ініциятора реактивациі Стоваришыня «Руска Бурса» в Ґорлицях. Для орґанізациі 2026 рік то так само пілокруглый ювілей – 35 років од одновліня діяльности, зато спільне святкуваня одбуде ся о 17.00 год. По прелекциі др габ. Анны Мусь зо Шлезского Університету, яка оповіст о змаганях Шлезаків з контексті народотворчых рухів, запрашаме на гостину. Просиме того дня в бурсяны порогы вшыткых любителів лемківской культуры, близшых і дальшых знаємых бурсы і, очывидно, вшыткых бывшых і актуальных бурсаків і радийовців.