Сумар дня 5. квітня/апріля 2024 р.

Приносиме вам сумар медияльной ґрупы ЛЕМ.фм+ на ден 5. квітня/апріля 2024 р.

Вмер о. протодіакон Дарий Макух

З жальом інформуєме, што вчера, в четвер 4. квітня/апріля в траґічным выпадку вмер о. протодіакон Дарий Макух. О. Макух служыл в лемківскій парохіі Благовіщыня Пресвятой Богородиці в Мальчыцях на Нижнім Шлеску. Днес од 18:00 год. в церкви в Мальчыцях буде правленый парастас. В суботу од 9.00 год. буде служена Божеска Літургія, по котрій пройдут похоронны богослужыня. Вічна памят!

Творит ся карпатскій бренд

В минулым місяци проходила в Ряшові польско-словацка стріча, зорґанізувана Стоваришыньом Карпатскій Еврореґіон. Участны бесідували о ідеях на будову карпатского бренду, в сфері зрівноваженой туристикы і культуровой дідовизны. Бренд Carpathia має быти брендом преміюм і має го характеризувати высока якіст туристичного продукту. Як подал председа Стоваришыня Давід Лясек, іде о прирыхтуваня туристичных продуктів і бізнесовых моделів, завдякы котрым тото, што єст в Карпатах найліпше, буде доступне в формі продукту на европейскых і світовых рынках. Карпатскій бренд буде ся зосереджал на получыню ріжнорідной і вельореліґійной культуры карпатскых земель та дикого простору гір з богатым світом природы.

Дальшы інвестициі на Парковій Горі в Креници

В тым тыжни рушыли працы над черговом атракцийом на Парковій Горі в Креници – Поляном Музикы і Світел. Так само в тым сезоні має быти на Парковій Горі зачата іщы єдна інвестиция – будова модерной видоковой вежы. Конкурсы оферт на будову видоковой вежы іщы тырвают, але подля Польскых Кабельных Желізниц (PKL) працы зачнут ся іщы перед вакациями. Обі інвестициі мают коштувати разом 10-15 млн злотых. Спілку PKL в ревітализациі верха і схылів Парковой Горы сперат ґміна Крениця, котра сама выконат додатково ремонт парковых алейок. Іх актуальный технічный стан єст барз планный, але по ремонті буде нима мож выіхати на верх горы дітячым візком. Видокова вежа, Поляна Музикы і Світел та новы алейкы мают служыти жытелям і туристам уж в будучым році.

Польскій президент обнял патронатом ювілей 100-літя незалежности ПАПЦ

Торжества ювілею 100-літя незалежности Польской Автокефальной Православной Церкви были обняты Почестным Патронатом Президента Польской Республикы Анджея Дуды. Інформувала о тым в минулым тыжни Канцелярия Православного Митрополиты Варшавского і Цілой Польщы. Окрем центральных святкувань в рамках ювілею сут заплянуваны товаришучы подіі в поєдных єпархіях, м.ін. концерты церковной музикы, популярнонауковы сесиі і тематичны выставы, вказуючы історию Польской Автокефальной Православоной Церкви і єй дорогу до незалежности.

Новый санітарный амбулянс в Польковицях

Як інформує ґміна Польковиці, в Польковицкым Центрі Здравотных Услух явил ся санітарный амбулянс, котрый буде транспортувал пациєнтів на лічыня і медичны консультациі. Дармовый санітарный транспорт пациєнты будут мочы схоснувати в ситуациі, коли явит ся конечніст лічыня окрисленой хвороты в інчій лікуючій пляцівці – з вылучыньом станів наглого загорожыня здоровля або жытя та для захованя неперерывности лічыня лікарьом основной здравотной опікы. Як підкрислят Павел Ґамбаль, председа Польковицкого Центра Здравотных Услуг, не єст то амбулянс скорой помочы і в припадку загорожыня здоровля або жытя треба кликати ґрупу медичных ратівників під номером 112. Санітарный амбулянс буде возил пациєнтів згідно з перше вызначеным пляном, з закладу здоровля до шпыталя на лічыня або регабілітацию. В польковицкым санітарным амбулянсі буде выізджала до пациєнтів професийональна ґрупа медиків. Амбулянс коштувал понад 650 тис. злотых.