Сумар дня на 25. вересня/септембра 2026 р.

Приносиме вам сумар медияльной ґрупы ЛЕМ.фм+ на ден 25. вересня/септембра 2026 р.

Др Богдан Горбаль одзначеный Кавальерскым Крестом Ордеру Заслугы Польской Республикы

Лемківскій історик і діяч в ЗША др Богдан Горбаль был одзначеный Кавальерскым Крестом Ордеру Заслугы Польской Республикы. Одзначыня вручыл др. Горбальови Президент Польщы Кароль Навроцкій, підчас візиты в Новым Йорку 20. вересня/септембра. Одзначыня было признане на внесок Ґенерального Консуля Польщы в Ню Йорку Матеуша Саковича. Др Богдан Горбаль отримал Кавальерскій Крест Ордеру Заслугы за выдатны заслугы для захованя, документуваня і популяризуваня спадковины Лемків, за будуваня позитивного образу Польщы в Зъєднаных Штатах Америкы. Богдан Горбаль вродил ся в 1965 р. в Сцінаві. По роді єст з Бортного і Мушынкы. Од молодых років был активный в лемківскым руху. Уж в часі студиюваня істориі на Вроцлавскым Університеті зачал публикувати своі лемкознавчы дописы. Был присутный при початках Стоваришыня Лемків, першой повыселенчой лемківской орґанізациі. Од основаня сучасных лемківскых періодичных выдань реґулярні публикувал в них історичны статі. Початком 90. років выіхал до Зъєднаных Штатів Америкы. По обороні докторату на Вроцлавскым Університеті завершыл іщы бібліотекознавчы студиі в нюйоркскым Квінс Коледж. Др Богдан Горбаль єст автором чысленных науковых прац по анґлицкы, польскы і по лемківскы. Од 1997 р. робит в Нюйоркскій Публичній Бібліотеці. Єст Директором Технічного Перетваряня Науковой, Промысловой і Бізнесовой Части Нюйоркской Бібліотекы та Куратором Славяньскых і Східньоевропейскых Колекций Бібліотекы. Др Богдан Горбаль полнит тіж функцию председы Лемко-Союзу (Lemko Association) – найстаршой лемківской орґанізациі в Америці.

В Креници побудуют нову ґондольову желізницю

В Креници рушыла велика інвестиция. Як інформувала ґрупа PKL (Польскы Кабельны Желізниці), 22. вересня/септембра зачали ся працы звязаны з рыхтуваньом паса терену під будучу трасу новой ґондолі, што получыт центр міста з Чорным Потоком і Креницком Яворином. Інвестор завершыл уж проєктовы працы і має позволіня на будову, в тым рішыня тыкаюче вылучыня ґрунтів з лісовой продукциі. Нова ґондольова желізниця з назвом Krynica Express буде долга на 2,15 км. Каждый з 35 ваґонів буде міг помістити 8 осіб. Плянувана траса буде тырвала 8 минут, што даст мінімальну перепустовіст 1000 осіб на годину. В найвысшым пункті переізду подорожуючы будут ся находити близко 30 метрів над земльом. Krynica Express буде мала характер довозовой желізниці. Подля інвесторя не лем злегшыт порушаня ся туристам і любителям зимовых спортів, але може тіж помочы в розладуваню дорогового руху. Подля креницкых власти будова новой ґондолі може ся завершыти іщы в 2027 р. В найблизшых тыжнях інвесторы мают запрезентувати дрібницьовый плян і візуализациі той інвестициі.

«Чорно-білый Бескід» Яцка Косібы і «Акварелі» Данєля Щербы

Днес в Мазярскій Загороді в Лоси пройде вернісяж выставы фотоґрафіі Яцка Косібы з назвом «Чорно-білый Бескід». Яцек Косіба од декад документує красу архітектуры і природы ґорлицкой землі і Низкого Бескіду. Його фотоґрафіі мож буде обзерати в Лоси до 20. грудня/децембра. В своі просторы просит тіж Туристична Інформация в Старій Ремізі в Высовій. До 13. листопада/новембра мож там обзерати выставу Данєля Щербы з назвом «Акварелі». Артиста в особливый спосіб вказує красу Низкого Бескіду з лемківском архітектуром – старыма хыжами ци дервняныма церквами.

Джерело фот.: www.prezydent.pl | Mikołaj Bujak KPRP