Сумар дня на 1. липця/юлия 2025 р.

Приносиме вам сумар медияльной ґрупы ЛЕМ.фм+ на ден 1. липця/юлия 2025 р.

Президент Пеллеґріні стрітил ся з представниками меншын

Президент Словациі, Петер Пеллеґріні стрітил ся вчера 30. червця/юнія з представниками меншын. Кажда меншына была репрезентувана через єдного члена Рады Влады СР про нацийональны меншыны, за русиньску меншыну участ взял Мартін Караш, председа Русиньской Оброды на Словациі. Президент Пеллеґріні підкрислил, што ріжнорідніст зміцнят державу, заповіл тіж роботу над зліпшыньом процесів тыкаючых Фонду на Підпору Культуры Нацийональных Меншын, так штобы дофінансуваня скорше трафляло до бенефіциєнтів. Важным аспектом, споминаным в часі стрічы, єст зрыхтуваня м.ін. новой уставы о поставліню меншын і бесіда о устаті о хоснуваню языків нацийональных меншых і і державным языку. Президент звернул тіж увагу на ситуацию міґрнатів, котры по приізді до Словациі находят ріжны барєры, м.ін. такы як долгы адміністрацийны процесы. Веце на тоту тему прочытате на нашым портали.

Ґміна Ропа плянує бесіды з Державныма Водами

Проблемом єст актуальный рівен воды в Климківці. Ґміна Ропа буде внескувала о збільшеный переплыв воды через запору на Климківці. Бесіды зачнут ся уж в половині липця/юлия. Як поінформувал війт ґміны Ропа, Кароль Ґурскій, буде она предовшыткым о захованю екосистему рікы Ропа і тырваючым уж туристичным сезоні. Што рока многє чысло туристів, а і жытелів сусідніх ґмін одпочывало над озерком. Того рока ґміна Ропа не одкрыє стереженого купалиска. Місце для купаня находит ся на ділянці, котру ґміна Ропа взяла в аренду од Державных Від, а актуальный рівен воды в Климківці не сігат до ділянкы. Додатковым утрудніньом єст проблематична будова дна озера. Власти ґміны хотят запевнити безпеку туристам, што утруднят верства мулу в низшых партиях. Купалиско буде заперте цілы вакациі, єднак власти ґміны не зрезиґнували з затрудніня двох ратівників, котры зачнут свій дижур 1. липця/юлия.

«Дегтярство – жыва спадковина Лемковины»

Музей Дворы Карвациянів і Ґладышів при спілпрацы зо Стоваришыньом Civitas Nostra зачали новый проєкт «Дегтярство – жыва спадковина Лемковины». Цілю проєкту єст документация і популяризация вынятковой традициі выпаляня дегтю в Білянці, в процесі сухой дестиляциі. В рамках проєкту ведены будут тереновы і архівальны досліджыня, в тым бесіды з жытелями Низкого Бескіду. Орґанізаторы зрыхтуют тіж фільм вказуючый цілый процес выпаляня. Зобраны інформациі мож буде провірити в публикациях, в часі варштатів або на інтерентовых порталях музею. Доцільово музей хоче своім діяньом довести до вписаня дегтярства з Білянкы на Державну листу нематерияльной культуровой спадковины.

Вакацийны варштаты в Маґурскым Парку

Маґурскій Нацийональный Парк просит діти до участи в вакацийных стрічах природы. Через наступных 8 тыжнів в кажду середу будут проходити тереновы спацеры. Найблизша прогулька пройде в середу 2. липця/юлія і ведена буде природничом стежком Кычера. Участ в ній можут взяти діти выже 8 років разом з опікунами. Занятя сут дармовы, єднак обовязуют скоршы записы. Дрібниці і актуальны прогулькы найдете на фейсбуковым сайті Маґурского Нацийонального Парку.