Сумар дня на 2. квітня 2026 р.

Приносиме вам сумар медияльной ґрупы ЛЕМ.фм+ на ден 2. квітня 2026 р.

ТАД одсвяткувал ювілей

В пятницю 27. марця єдиный во світі русиньскый професийональный театр – Театр Александра Духновича (ТАД) в Пряшові одсвяткувал свій округлый ювілей – 80 років. Днешній ТАД выникнул 24. листопада/новембра 1945 р. як Украіньскій Нацийональный Театр (УНТ), і тоту назву мал аж до 15. жолтня/октобра 1990 р., коли стал Театром Александра Духновича. Но першу премєру «Ой, не ходи, Грицю, тай на вечорниці» мал 2. марця 1946 р. Наперед присутны выбрали ся на гріб Івана Гриця-Дуды (рр. 1911-1999) – основателя і першого директора товдышнього УНТ. Пак акторы і робітникы ТАД пішли під памятник Александра Духновича в Пряшові, і там оддали чест будительови положыньом квітя. Єдным з пунктів святкуваня было одкрытя в будівли ТАД пропамятной таблиці – де по словацкы і по русиньскы є написане Александер Духнович, рокы народжыня і смерти, а так само славны слова з його стиху Вручаніє, написаны історичном ґраматиком Духновича, „Я Русинъ былъ, есмь, и буду“. Пак проходила дальша част святкуваня – ґаляпроґрам. На конец одбыла ся ювілейна премєра по русиньскы – «Бідов о землю!».

Ґорлицкій Одділ Польского Червеного Креста в Ґорлицях підсумувал минулый рік

Районове Одділіня Польского Червеного Креста в Ґорлицях підсумувало діяльніст за минулый рік, підкрислюючы шырокій засяг акций і заанґажуваня волонтерів та осіб, што оддают кров. Орґанізация активно діяла в обшыри помочы потрібуючым, промоциі почестного донаторства кырви та гуманітарных ініциятив. Важным елементом діяльности были акциі збераня кырви, котры в 2025 р. згромадили вельо осіб готовых поділити ся тым безцінным даром. В рамках підсумуваня рока звернено увагу на спілпрацу з самоурядами, школами та інчыма інституциями. Минулый рік потвердил, же ідея безінтересовной помочы і солідарности дальше є жыва, а діяльніст орґанізациі має значыня для локальной спільноты. Орґанізация заповіла дальше розвивати своі ініциятивы в 2026 р.

Долуч ся до орґанізациі Лемківской Ватры на Чужыні

Орґанізаторы Лемківской Ватры на Чужыні просят до спільного творіня ближучой ся 46. Лемківской Ватры на Чужыні, яка одбуде ся в Михалові на Нижнім Шлеску в днях 31. липця/юлия – 2. серпня/авґуста. Мож діяти в выбраным ансамбли: артистичным – при проґрамі і спілпрацы з артистами, промоцийным – творячы зміст на соспільны медиі, та спортовым – помагаючы при рыхтуваню вартровиска. Заінтересуваны можут писати на майль: watramichalow@gmail.com. Орґанізатором Лемківской Ватры на Чужыні єст Стоваришыня Лемків.

Шпыталь в Бардийові по ремонті

Шпыталь з поліклініком св. Якова в Бардийові закінчыл комплексовый ремонт психіятричного ліжкового одділіня. Тырвал од листопадада/новембра 2024 р. до червця/юнія 2025 р., і фінансуваный был з середків Пляну одновы і одольности, а так само з пожычок. Выремонтуване одділіня святочно одкрыли в понедільок за участи словацкого міністра здоровля Каміля Шашка. Подля директора шпыталя Марияна Петка в рамках реконструкциі выникла нова приймова амбулянция, де ходят пациєнты з реґіону Бардиів, Свидник і Стропків через 24 годины і сім днів на тыжден. Одділіня рахує 29 ліжок.

Христос Воскрес (по першый раз)!

A на конец з нагоды ближучого ся праздника праздників – вшыткым любителям нашых медий, зосередженых при Медияльній Ґрупі ЛЕМ.фм+ – хочеме желати пережыти тот великодній час з радістю, теплом і надійом на іщы ліпше будуче. Желаме Вам Спокійных Свят, а з нима смачной паскы і кобаскы, острого хріну, яєц, а предовшыткым глубокой віры в дане Воскресшым Христом вічне жытя. Того желат редакция ЛЕМ.фм і члены Стоваришыня «Руска Бурса» в Ґорлицях.