Сумар дня на 1. вересня/септембра 2023 р.

Приносиме вам сумар медияльной ґрупы ЛЕМ.фм+ на ден 1. вересня/септембра 2023 р.

Петиция в справі обороны резервату Біла Вода

Жытелі Явірок, гості і люботелі Пєнін жадают од власти стримати комерцийну інвестицию, котра має быти побудувана в резерваті Біла Вода. В справі обороны того місця была одкрыта соспільна петиция скєрувана до бургомайстра міста і ґміны Щавниця, котру підписало уж близко 10 тис. осіб. Причыном протесту єст плян будовы посередині резервату готельового комплексу для гости з реставрацийом, паркінґом і господарчыма поміщынями. Як пишут в петициі, Біла Вода то єдна з найціннійшых краєвидово і природничо закутин Польщы, і барз залежыт ім, жебы остала в незміненій формі – для добра будучой там природы і одвиджаючых тото місце туристів. Вірят, же будова готелю і само істнуваня такой діяльности влине неґативно на середовиско – в резерваті выступує много ґатунків птахів, звірят і хороненых рослин, в тым ендемічных для того реґіону. В петициі просят власти ґміны Щавниця підняти зміны в пляні просторного заґаздуваня, жебы не допустити до реченой інвестициі, як і м.ін. выдати неґативне середовискове рішыня Реґіональном Дирекцийом Охороны Середовиска в Кракові. Жадают лишыти резерват в незміненій формі і обняти го охороном.

Конец записів на VI піше поломництво зо Ждыні до Ґорлиц

Припоминаме, што Братство Православной Молодежы Перемышльско-Ґорлицкой Єпархіі просит до участи в VI пішым поломництві зо Ждыні до Ґорлиц на свято покровителя єпархіі – святого священномученика Масима Ґорлицкого. Записы до участи в поломництві сут одкрыты іщы лем до кінця того тыжня, неділі 3. вересня/септембра. Поломництво зачне ся в віторок 5. вересня/септембра од св. Літургіі в церкви Покровы Пресвятой Богородиці в Ждыни, де св. Максим был хрещеный. Дальше поломникы підут через Ждыню, Ґладышів, Маластівску Маґуру, Прислоп, Новицю, Білянку, Шымбарк і Ропицю Польску до Ґорлиц, де о 17.00 год. в катедральній церкви буде служена всеночна. В ден свята, в середу 6. вересня/септембра, служены будут дві Літургіі – перша о 6.00 год., дальше о год. 8.30 буде чытаный акафист перед мощами св. Максима, а по привитаню прибывшых єрархів служена буде головна Божеска Літургія.

Одкрытый ден в Полянах Суровичных

Заран, в суботу 2 вересня/септембра в Полянах Суровичных, селі находячым ся на східній Лемковині, одбуде ся одкрытый ден, в рамках котрого буде мож одвидіти стару лемківску дзвінницю, котра в остатніх роках была постепенно ремонтувана. В годинах од 11.00 до 14.00 буде мож зайти на выжні поверхы і послухати про проєкт одбудовы і історию села, церкви, дзвінниці і цмунтеря. Мурувана дзвінниця єст єдином захованом частю церковного комплексу грекокатолицкой церкви Михала Архангела в Полянах Суровичных, а тіж єдным з остатніх слідів по жыючых гын Лемках.

Сріча з кухньом Погірян і Лемків

На тоту неділю, 3. вересня/септембра, Музей Дворы Карвациянів і Ґладышів рыхтує стрічу з кухньом Погірян і Лемків. Подія пройде в рамках Европейскых Дни Спадковины. Будут то варштаты і показы традицийной кухні Лемків і Погірян. Стріча пройде в Скансенсі Погіряньского Села в Шымбарку. Вчас єднодньовых варштатів участникы познают давны кулінарны рецептуры з Низкого Бескіду. Буде вказана і принагідна часова выстава посвячена давному нарядю, якє хоснувало ся в кухни вчас варіня/рыхтуваня ідля.

Джерело фотоґрафіі: avaaz.org Petycje Obywatelskie: Petycja w sprawie obrony rezerwatu Biała Woda w Pieninach