Сумар дня на 1. жолтня/октобра 2021 р.

Приносиме вам сумар медияльной ґрупы ЛЕМ.фм+ на ден 1. жолтня/октобра 2021 р.

Ґрупа приятелів меншын в нацийональній раді Словацкой Республикы

Як подала аґентура TASR, в нацийональній раді Словацкой Республикы могла бы выникнути ґрупа приятелів меншын. Выникнутя реченой ґрупы хотят ініциювати незалежный депутат парляменту Мирослав Коллар і бывшый полномічный влады Словацкой Республикы про ромскы комуніты Абель Равас. За словами Коллара, задачом ґрупы буде рыхтувати становиска і припомніня ґу парляментарным пропозициям, котры мают досяг на меншыны, а пак дискутувати о них з одповідньом ґрупом депутатів Нацийональной Рады Словацкой Республикы. Припомнийме, же по парляментарных выборах, котры на Словациі проходили в 2020 році, першыраз в істориі словацкого парляменту меншыны не мают в ним своіх представників в рамках даякого політичного підмету.

В Маґурскым Парку нелеґально застрілили єленя

В Маґурскым Нацийональным Парку нелеґальны полювачы застрілили єленя. Пару днів тому працівник Парку почул звук стріланя ідучого з лісовых верхів горы Кірила. Коли пішол провірити терен, стрітил двох мужчын, што несли карабин і трофей з єленя з рогами. Было то в Розстайным в ґміні Крампна. 48-річный громадянин Чешской Республикы і 39-річный громадянин Словациі были затриманы поліцийом. Мужчынам горозит аж і до осмох років вязниці.

Новый міст на державній дорозі нр 19

В місцевости Ясениця Росельна на державній дорозі нр 19 на полудне од Ряшова єст уж готовый новый міст. Дотля треба было в тым місци корыстати з тымчасового обєкту. Скінчыли ся тырваючы од понад рока працы і звязаны з нима утрудніня, што значыт, же з Підкарпатя скорше буде мож тепер доіхати до границі зо Словацийом в Барвінку та в Низкій Бескід.

Осінній Редик в Ославици

В суботу, 2. жолтня/октобра, в Колибі у Франоса в Ославици пройдут Стрічы на Пастырскым Шляку – Осінній Редик на Шляку Волошской Культуры. Початкови осіннього редику будут товаришыти музичны выступы Капелі Валасі і фольковой ґрупы Інуля. В проґрамі нашли ся і такы атракциі як стріляня з луку, ярмак ремесла і реґіональных продуктів, зілярска прогулька ци почастунок брындзьом.

Новы інтерпретацийны панелі в Маґурскым Парку

Маґурскій Нацийональный Парк зрыхтувал для одвиджаючых новы атракциі. Од недавна вандруючы по Парку можут смотріти інтерпретацийны панелі. Закля што находят они ся в двох місцевостях – Свіржовій Великій і Незнайовій. На панелях находят ся персоны, обєкты або краєвиды історичні звязаны з реґіоном. Думку зреализувано в рамках проєкту «Ровером через Погранича – природа, культура і істория на двох колесах».