Сумар дня на 10. грудня/децембра 2020 р.

Приносиме вам сумар медияльной ґрупы ЛЕМ.фм+ на ден 10. грудня/децембра 2020 р.

Онляйн премєра од «Терочкы»

Вертаме іщы споминами до тогорічного Дня Русинів в Польщы. Нацийональне свято упамятнил своім онляйн выступом так само і молодіжный ансамбль Руской Бурсы в Ґорлицях – «Терочка». Слідом славной «Лемковины» з Білянкы, в суботу, 5. грудня/децембра 2020 р., выспівал премєрово лемківскій гымн «На Лемковині». Премєрове выконаня одбыло ся лем онлянй в сіти Facebоок і на сайті YouTube. Премєрове высыланя одбыло ся о 9.00 год. В награню взяли участ члены ансамблю «Терочка», якы своі поєдны выступы награли дакус скорше, жебы пізнійше были они зъєднаны і припущены до єдной відеореляциі. Ґрупу зрыхтувал артистичный кєрівник ансамблю Андрий Трохановскій. Ґратуляциі доброго выконаня склал сам Маестро Ярослав Трохановскій. «На Лемковині» то вершуваный твір написаный Учытельом – Іваном Русенком. В пізнійшых роках, коли Лемкы потрібували міцного покріпліня іх тужынь, музику до того верша скомпонувал Ярослав Трохановскій, якій скоро ввюл тот дальшый патріотичный твір до репертуару ансамблю «Лемковина». Пісня скоро была признана народом за лемківскій гымн. Звучала всядиль там, де зо своіма концертами ходил білянчаньскій ансамбль, хоц не все была згода на тото комуністичной цензуры. Выконананя найдете хоц бы і на нашым портали.

Голосуйме на «Ольховец Лемків втраченый»

Выдавництво «Жызновскій» просит оддавати голосы в тогорічній едициі конкурсу «Зобрана істория» на книжку авторства Миколая Ґабло під назвом «Ольховец Лемків втраченый». Цілю конкурсу єст вынаходжыня найцікавшых історичных публикаций, опибликуваных в даным році в польскым языку. Книжка Миколая Ґабло то оповіданя о істориі лемківского села Ольховец, што лежыт на середній Лемковині. Ґабло описал в ній так само і богату культуру, традициі і звыкы. То дальша лемкознавча публикация, яка явила ся того рока. Голосы мож давати на сайті historiazebrana.pl.

Дебютанстка книжка од Мариі Шмайдовой

В остатніх днях з друку вышла дебютантска книжка Мариі Шмайдовой під назвом «У дїдка на дворї», котру выдала Сполок Русиньскых Писателів Словациі. Авторка перед роком дебютувала зо своіма текстами в рамках 6. річника Літературного Конкурсу Мариі Мальцовской. Выграла товды третє місце. Мария Шмайдова (р. нар. 1964) своє ціле дітинство пережыла во Свиднику. Там скінчыла основну освіту, а студиі зробила в Нітрі. 22 рокы учытелювала на школах Свидницкого і Стропківского окресу. Тепер робит на Шкільным Уряді в Стропкові. Дебютанстка книжка є збірком 17 короткых оповідань про діти, котры обогатила ілюстрациями Славка Самчікова. Книжка є дакус і інтерактивна. По каждым оповіданю найде малый чытатель, або тот, хто то дітині чытат, звіданя, на котре треба одповісти. І так ся мож з дітми забавити і по прочытаню короткого тексту. Книжка Мариі Шмайдовой є написана по русиньскы азбуком, но в задній части найдеме оповіданя і в латинці в русиньскым языку.

Модернізация Народного Дому в Новоселиці

Народный Дім в Новоселици в окресі Снина, котрый люде на Словациі знают як хыжку Дідка Вечернічка, зас выглядат так, як го знат телевізийна публика вечерничків – вечерніх телевійных приповідок. Хыжа была оновлена в ориґінальній подобі. Датувана є на злам ХІХ і ХХ ст. То послідній обєкт того типу, котрый є на терирориі Пряшівского Самосправного Краю з соломяном стріхом і не находит ся в скансені. Ціла обнова хыжы заняла 4,5 місяця. Робота як раз зо соломяном стріхом была найтяжша. Хыжа перешла загальный ремонт, но роботы іщы не суты закінчены. Треба докінчыти інтерєр і екстерєр коло будинку. RTVS, т.є. радиово-телевізийна державна спілка на Словациі, являт ся тепер властительом споминаной хыжкы. Хотят, жебы хыжа остала туристичном атракцийом. Народный Дім в Новоселици остал частю памяткового фонду Словацкой Республикы в 1987 році. О сохраніня хыжы постарало ся староство Новоселиці. Обновили єй і завдякы дотациі з Міністерства Культуры Словациі.

фот. выдавництво «Жызновскій»