Сумар дня на 1. липця/юлия 2026 р.

Приносиме вам сумар медияльной ґрупы ЛЕМ.фм+ на ден 1. липця/юлия 2026 р.

По дебаті в Варшаві

В минулый четвер в Державным Етноґрафічным Музею в Варшаві одбыла ся дебата посвячена сучасній достоменности Лемків, языкови і выкликам, котры звязаны сут з захованьом і розвитком русиньской культуры. В дискусиі участ взяли проф. Лідия Стефановска, Юрий Стариньскій, Оксана Грабан-Ліхтаньска, др Михал Шымко і Наталия Малецка-Новак. Модерувал др габ. Пьотр Маєвскій. Участинкы дебаты підкрисляли, што штораз веце осіб деклярує лемківску етнічну приналежніст, але зменшат ся чысло осіб, котры хоснуют наштоден язык. Вельо місця посвячено потребі підпераня вчыня языка через школы, курсы, медиі і модерны едукацийны материялы і технолоґіі. Звернено увагу на брак професийных інституций, котры бы системово підперали розвиток лемківской культуры і едукациі. Порушено тіж тему політичной репрезентациі і наслідств повоєнного розсіяня громады. Участникы вказували, же утруднят то успішне репрезентуваня інтересів соспільности. Звінчыньом дебаты было сформуваня стверджыня, же мимо історичных трудности і загорозы для языка, культура ся розвиват і видно великє ньом заінтересуваня ззовни.

ПСК проти плянам одновліня Войскового Округу Яворина

Пряшівскій Самосправный Край противит ся плянам одновліня Войскового Округу Яворина. Явила ся і соспільна петиция проти тій думці. Підчас сесиі 22. червця/юнія радны ПСК приняли становиско, в котрым закликуют Словацию і Міністерство Обороны, жебы высофали ся з діяня, котре може ограничыти цивільне схоснуваня теренів давного Войскового Округу Яворина. Самоуряд арґументує, што терен тот має великє значыня для розвитку туристикы, рекреациі і роверовой інфраструктуры. Тема вернула по послідніх выповідях міністра обороны Роберта Калиняка, котры потвердили, што войско розважат схоснувати округ Яворину як новый школіньовый поліґон. Міністер заґарантувал, што ресорт не буде позбавлял маєтку люди. Давный Войсковый Округ Яворина фунґувал од 1952 р. і обнимал веце як 31 тис. гектарів, в тым русиньскы села. Проти плянам, жебы привернути войсковый характер той обшыри, выникла інтерентова петиция. Єй ініцияторы підкрисляют, што реґіон винен служыти мешканцям і розвиткови локальной господаркы.

Записы на грекокатолицкє поломництво на Святу Гору Явір

До 9. липця/юлия мож ся зареґіструвати до участи в пішым грекокатолицкым поломництві на Святу Гору Явір, якє одбуде ся в днях од 12. до 14. липця/юлия тр. Вело буде од Лютины на Словациі, через Мальців, Ґабольтів, Нижній і Выжній Тварожец і Цигельку. Богослужыня залянуване єст на початку поломництва, в Лютині, і пак на Святій Горі Явір. Архієрейска літургія з процесийом буде попереджена молебном до Пресвятой Богородиці. Поломникам буде забезпечене ідло, спаня, перевезіня баґажу, а на трасу треба мати зо собом одповіднє облечыня, вкрытя головы, охорону перед дощом, а на місци спаня карімату і спальный мішок. Дрібниці на сайті gora-jawor.pl.

Путю переходу Лемків на православія

Грекокатолицкє полмоництво попередит православне – в днях од 10. до 12. липця/юлия. Траса весла буде путю переходу Лемків на православія – од Тылявы, через Ґладышів і Ганчову. В тамтышній церкви 11. липця/юлия служена буде всеночна, а в ден праздника Первоверховных Апостолів Святых Петра і Павла на Святій Горі Явір одбуде ся архієреска літургія, котра завершыт поломництво. Записувати мож ся до 6. липця/юлия.