Сумар дня на 11. грудня/децембра 2020 р.

Приносиме вам сумар медияльной ґрупы ЛЕМ.фм+ на ден 11. грудня/децембра 2020 р.

Ґміна Липинкы оддана покрові Богородиці

Вчас сесиі, котра прошла 8. грудня/децембра т.р., в ден католицкого свята Непорочного Зачатя Дівы Мариі, радны Ґміны Липинкы, в котрій находят ся і лемкіскы села, як Роздзіля ци Боднарка, приняли резолюцию оддаючу Ґміну Липинкы покрові Богородиці. За резолюцийом оповіло ся дванадцетеро з 13 радных беручых участ в засіданю. Од голосу стримала ся радна з Роздзіля Лідия Тылавска. Проєкт резолюциі запропонувал війт ґміны Чеслав Ракочый. В прошлым радны ґміны приняли уж подібны резолюциі, м.ін. в обороні креста та хоронячу молодіж перед шкідливыма ідеолоґіями і згіршыньом. Вітіркова резолюция, подля ведучого рады ґміны Боґдана Челусняка, якій одчытал єй проєкт, є завершыньом великых резолюций, котры творят спільну (цитуваня) «малу моральну конституцию» Ґміны Липинкы. В змісті резолюциі є м.ін. деклярация охороны жытя од зачатя ци обороны родины розумленой в традицийный спосіб.

Велика спортова подія тіж в Креници

Гірскы змаганя в бігах, змаганя в бойовых спортах і змаганя на біциґлях MTБ, то конкуренциі, якы мают пройти в Креници вчас ІІІ Европейскых Ігр «Краків-Малопольща 2023». Курорт буде спілорґанізатором подіі. Власти Крениці одраз приняли запрошыня до ґрупы партнерскых міст Европейскых Ігр. Як підкрислят бургомайстер Пьотр Рыба, на участи в тій подіі, курорт може лем зыскати. Покликал уж робочу ґрупу, котра займе ся орґанізацийныма справами, готельовом базом і безпеком спортовців. В змаганях, котры проходити будут на обшыри ґміны і міста, участ возме 5 тис. самых спортовців. Власти тішат ся на можливіст промоциі і розвитку міста. Власти Малопольского Воєвідства запросили до спілпрацы тіж Тарнів і Закопане.

Буде обводниця Ліґниці

Ліґницкій порталь подал, што уряд ґміны Ліґниця вєдно з Ґенеральном Дирекцийом Державных Дорів і Автострад підписали догваріня з проєктантом на опрацуваня проєктовой документациі в справі побудуваня обводниці Ліґниці. Термін закінчыня опрацовуваня документациі то друга чвертка 2024 рока, а вартіст догваріня то 1,4 млн зл. Ліґницка обводниця має быти побудувана в рамках урядового Проґраму Будовы 100 Обводниц на рокы 2020-2030. Інвестиция долгости неполных 4 км дозволит утворити спійный комунікацийный уклад доріг A4, S3 i DK94 о державным і медженародным значыню, без конечности візджати до центра міста.

Зберают горшы на додрук «Лемкіской Книжочкы»

Фундация Стара Дорога оголосила соспільну колекту на додрук публикациі пн. «Лемкіска Книжочка», котрой єст выдавцьом. В рамках вплат окрисленой высокости мож достати: малюванку «Лемківска Азбука», речену книжочку, календар Лемколянд на 2021 рік або «Ілюструвану книгу лемківскых приповідок», доступны сут тіж пакєты книжочкы з інчом выміненом публикацийом. В книжочці авторства Павлины Бялковской находят ся основны інформациі о штоденным жытю Лемків до 1947 р. вказаны головні в ґрафічный спосіб, а дополены короткыма описами. Адресатами публикациі сут радше наймолодшы чытачы. Єй печатаня прошло в 2017 р. Невеликій тираж спричынил, што одраз стала ся недоступна. В 2019 р. публикация «Лемкіска Книжочка» отримала ІІІ нагороду в 27. Перегляді Краєзнавчой і Туристичной Книжкы в катеґориі «Выдавництва для діти».