Сумар дня на 11. квітня/апріля 2022 р.

Приносиме вам сумар медияльной ґрупы ЛЕМ.фм+ на ден 11. квітня/апріля 2022 р.

Онляйновый словник кашебского языка

Фундация Кашебы хоче зробити професийный онляйновый словник кашебского языка. Як бесідуют члены Фундациі, кашебскій язык хоснує около 100 тис. осіб, 20 тис. діти вчыт ся го в школах, єднак фурт неє в інтернеті професийного кашебского словника онляйн. Середків на реализацию проєкту не повело ім ся достати од інституций. З причыны погіршаючой ся кондициі кашебского языка не можут ждати на дофінансуваня, зато рішыли одкрыти інтернетову колекту. Єй ціль то 50 тис. злотых. Словник має быти доступный для каждого дармо. На початку плянуют додати 25 тис. госел. В будучности хотят збогатити проєкт через доданя наступных госел, ґраматичных одмін, інчых языків, аплікациі зо словником ци онляйновых курсів кашебского языка.

В Креници выремонтуют ледову галю

О рік в Малопольщы мают ся одбыти Европейскы Ігры, в якых змагати ся будут найліпшы спортовці Старого Континенту. Велика спортова імпреза, яка має проходити од 21. червця/юнія до 2. липця/юлия, загостит м.ін. в Креници. В звязку з тым місто має в плянах шор інвестиций. Выремонтувана має быти Ледова Галя, одновлены і освітлены трасы на Парковій Горі, выремонтуваны некотры улиці і водны резервуары. Як поінформувал на своім фейсбуковым сайті бургомайстер Крениці Пьотр Рыба, місто отримало дофінансуваня з буджету державы на комплексовый ремонт ледовой галі, в якій в часі Ігр будут проходити змаганя в бойовых спортах. Квота дофінансуваня то близко 18 млн злотых, тє. 90% коштів ремонту. Тырвают проєктовы працы. Ремонт має ся зачати в третій чвертці того рока. Роботы обнимати будут м.ін. зміцніня конструкциі, модернізацию систему вентиляциі, выміну дахового покрытя ци заложыня фотовольтаічных панелів. Як бесідувал бургомайстер Крениці Пьотр Рыба, Европейскы Ігры то для міста неповторна шанса на промоцию, розвиток і поправу стану спортовой інфраструктуры.

Пляжа на креницкым Чорным Потоці

Тырвают роботы при будові новой атракциі на креницкым Чорным Потоці. При побудуваных заливовых басенах, маючых забезпечати жытелів перед выливом при більшых дощах ци розтопах, сут тепер рыхтуваны рекреацийны місця. Докола воды была уж посіяна трава, а на другій части берега мают зробити пляжу – на земли буде положена ґеотекстиль, на яку пак высыплют пісок. Атракция має служыти не лем літом, але тіж зимом для любителів морсуваня. Цілковитый кошт інвестициі то близко 100 млн зл. Офіцийне одкрытя пляжы на Чорным Потоці єст плянуване на 11. червця/юнія. Подіі мают товаришыти многы культурны і спортовы атракциі.

Новый туристичный комунікат Бєщадского Нацийонального Парку

8. квітня/апріля Бєщадскій Нацийональный Парк выдал новый туристичный комунікат. Інформує в ним, же вшыткы шлякы і природничы стежкы на обшыри Парку сут доступны для туристів. В ниже находячых ся обшырях заникат сніжна покрыва, але туристы фурт мусят быти осторожны, зато же на путях єст мокро, а місцями сут іщы покрыты ледом. В высшых партиях гір сніжна покрыва єст нерівно розложена, сніг єст мокрый і тяжкій. Незалежно од заникаючой сніжной покрывы фурт выступує перша ступін лявіновой загорозы. Природникы припоминают, же ідучы в горы все треба провірити актуальну проґнозу погоды на вебсайті ґрупы GOPR та запознати ся з поданыма на стороні Парку вказівками і мапом, што тыкают одвиджаня Парку в зимовым періоді.