Сумар дня на 11. січня/януара 2024 р.

Приносиме вам сумар медияльной ґрупы ЛЕМ.фм+ на ден 11. січня/януара 2024 р.

Засідала редакция журнала «Отцюзнина»

Як інформувал Юрий Шыпович, голова Русиньского Культуролоґічного Клюбу і головный редактор культурно-белетристичного журнала «Отцюзнина», 3. січня/януара в Центрі Словацкой Культуры в Ужгороді одбыло ся засіданя редакцийной колеґіі публикациі. В засіданю брали участ і дописувателі того періодику, Михаіл Зан, Володимір Фенич, Павел Леньо. Участикы бесідували о роботі над третім чыслом обновленого часопису і його обсягу. Як дальше подавал Шыпович, Фенич запропонувал запровадити до него рубрику Вызнамні карпаторусины. «Отцюзнина» є журналом, котрый выходит раз на квартал, так тіж Михаіл Куцкір запропонувал на сторону часопису давати о одповідній порі рока (коли выходит чысло) пейзаж авторства єдного з вызначных карпаторусиньскых малярів. Публикация выходит як кварталник з тиражом 500 примірників. Одновити выданя нашого єдиного журнала на Підкарпатскій Руси подарило ся в 2023 р. завдякы помочы проф. Павла Роберта Маґочія. Електронічны версиі «Отцюзнины» можете чытати і на нашым портали.

По парох роках вертат Колядуваня в Рускій Бурсі

Приємно можеме заявити, же по парох роках перервы вертаме з дорічным Переглядом Колядничых Ґруп в Рускій Бурсі в Ґорлицях. То подія, яка в попередніх едициях притігала не лем діти, учеників, іх учытелів і родичів, але предовшыткым любителів лемківской культуры. Тогорічне бурсяне колядуваня одбуде ся в четвер, 25. січня/януара о 10.30 год. в просторах ґорлицкой бурсы. Выступлят діти – ученикы лемківского языка з з Бодаків, Высовоы, Ганчовы, Брунар, Баниці, Ґладышова, Устя, Снітниці і Розділя. Выступуючы ґрупы рыхтуют учытелькы Анна Рыдзанич, Орина Гутиряк (враз з імостю Марийом Цідило) і Варвара Дуць. Колядничу ґрупу з Розділя рыхтує о. Григорий Пацан. Красні просиме!

Дві святочны подіі в Польковицкым Центрі Культуры

Як інформує Польковицкій Центр Культуры, 14. січня/януара одбуде ся Новорічна Ґаля в італияньскым климаті. Подія зачне ся о 18.00 год. в Аули Форум. На сцені выступит знаный польскій публиці Стефано Терацціно, котрый не лем затанцує, але тіж заспіват. Пару дни пізнійше, 19. січня/януара о 18.00 год. в Салоні одбуде ся концерт коляд, пасторалок і інчых творів, якы выконат музичный дует Lu&Kam. На обі подіі просит місто Польковиці. Деталі на сайті polkowice.eu.

В Гуменным завершыли модернізацию Містецкого Культурного Центра

Місто Гуменне докінчыло модернізацию Містецкого Культурного Центра. В рамках проєкту дошло одновили театральну салю вєдно з інсталяцийом новых модерных сценічных елементів і світел. Частьом модернізациі было і зліпшыня гіґієнічных стандардів і аплікация новых інновацийных технолоґічных елементів в цілым споминаным центрі. Цілковитый кошт проєкту выносит більше як 223 тис. евро. Част фінансів походит з буджету міста Гуменна. Пак більша част буде звернена місту з центрального буджету. Містецкій Культурный Центр буде неодолга зас служыл жытелям міста.