Сумар дня на 12. грудня/децембра 2022 р.

Приносиме вам сумар медияльной ґрупы ЛЕМ.фм+ на ден 12. грудня/децембра 2022 р.

Черговый проєкт Стоваришыня Любителів Лемковины – «Істория Талергофців»

Стоваришыня Любителів Лемковины підсумувало свій черговый проєкт, якого головном цілю было заховати трансмісию історичной памяти для наступных поколінь. Проєкт пн. «Істория Талергофців» был зреализуваный в 2022 р. з помочом Міністерства Культуры і Нацийональной Спадковины та Музею Істориі Польщы в Варшаві. Цілю было вказати мало знаны факты з істориі лемківской меншыны, тыкаючы концентрацийного лаґру в австрийскым Талергофі. Патронат над задачом обнял владыка Паісий – архієпископ перемышльскій і ґорлицкій ПАПЦ. В часі тырваня проєкту Стоваришыня працувало над одтворіньом мало знаной істориі мартиролоґіі лемківской соспільности з обшыри малопольского воєвідства. В рамках задачы были проведены кверенды в архівах та музейных і приватных колекциях, цілю найти архівальны фотоґрафіі, документы і спомины вказуючы жытя вязненых в лаґрі. Глядано і місц, де были похоронены тоты, котрым повело ся вернути з лаґру на рідну землю. При нагоді меджепоколіньовых варштатів были выбраны материялы, выекспонуваны пак в ґорлицкым Осередку Православной Культуры «Ельпіс» і каталоґу. Проєкт «Істория Талергофців» был пробом одтворіня мало знаного етапу істориі і приверніня памяти о вызначных особах, якы ся причынили до одбудовы історичной памяти і плеканя нацийональных традиций.

Одкрытый выклад про культуровы краєвиды Лемковины і Бойківщыны

Выділ Малярства і Рисунку Артитичного Університету в Познані просит на одкрытый выклад пн. «Памят/непамят. Антрополоґічне пізріня на культуровы краєвиды Лемковины і Бойківщыны». Выклад выголосит др габ. Анна Вероніка Бжезіньска – дослідничка, професорка на Выділі Антрополоґіі і Культурознавства Артистичночо Університету в Познані в Закладі Етнолоґіі. Выклад одбуде ся на плятформі Google Meet уж позаране, в середу 14. грудня/децембра о год. 13.30. Мотузок до стрічы можете найти в дописі на інтернетовым сайті Університету.

Проєкт «Сила Карпат» в рамках фестівалю «Міц Гір»

Уж в тот вікенд, од 16. до 18. грудня/децембра в Татряньскым Музею в Закопаным пройде 18. едиция фестівалю «Міц Гір». Окрем гірской тематикы, фестіваль тым разом порушыт і тему Волохів. Орґанізатор фестівалю просит до участи в фільмовых проєкциях, авторскых стрічах, але і подіі «Сила Карпат», якы посвячены будут волошскій культурі. Вступ на вшыткы пункты проґраму проєкту Сила Карпат єст безплатный. Присутны будут мочы взяти участ в «Волошскых ремесельных варштатах», в «Волошскым дискусийным панели», аж і піти на прогульку нп. «Волошска культура в дорозі» з провідниками, по скоршым потверджыню участи. На офіцияльным сайті фестівалю Міц Гір мож найти його полный проґрам та записати ся до участи в подіях проходячых в рамках «Силы Карпат».

Велия Культур і Народів в Ґожові

І в тым році в Ґожові Великопольскым одбыла ся Велия Культур і Народів. В суботу 10. грудня/децембра за єдным столом сіли Лемкы, Вільнюкы, Полешукы, Львівякы, Украінці та Ромы. Велия Культур і Народів орґанізувана є в Ґожові од 2007 рока. Стрічу орґанізує Стоваришыня Творців і Приятельів Циґаньской Культуры в Ґожові Великопольскым. Цілю подіі єст інтеґрация, а предовшыткым припоминая і утырваляня різдвяных традиций і страв нацийональных меншын і етнічных ґруп.