Сумар дня на 12. лютого/фебруара 2020 р.

Приносиме вам сумар медияльной ґрупы ЛЕМ.фм+ на ден 12. лютого/фебруара 2020 р.

В Румуниі Русины будут празднувати

Од 27. лютого/фебруара до 1. марця в Румуніі празднувати будут 20. ювілей істнуваня Культурного Товариства Русинів Румуніі. Орґанізацию од основаня веде Ґеорґій Фірцак, котрый был тіж м.ін. депутатом румуньского парляменту як представник Русинів. Центр Товариства находит ся в місті Дева і має своі філіі в 5 реґіонах – Альба, Клюж, Гунедоара, Марамуреш і Сучава. До ціли Товариства Культуры Русинів Румуніі належыт головні популяризуваня серед румуньской соспільности інформаций о істнуваню Русинів та плеканя русиньской культуры і самоусвідомліня Русинів Руминіі. Орґанізация реалізує тото за посередництвом культурных подій, орґанізуваньом выкладів ци печатаньом інформацийных материялів по русиньскы і по румуньскы. Што рока орґанізуют і Ден Русинів Румуніі. В 2015 році ХІІІ Світовый Конґрес Русинів проходил во спомненій Деві.

Борба о ліпше повітря

В понедільок, 10. лютого/фебруара, в ріжных містах Малопольщы, в тым в Ґорлицях, проходили тереновы стрічы, котрых цілю была бесіда про актуалізацию Проґраму охороны повітря для малопольского воєвідства. Презентуваны были м.ін. пропозициі направчых діянь та новы обовязкы для ґмін, повітів, предприємців і вшыткых жытелів Малопольщы. На запрошыня радной Малопольского Воєвідства Ядвіґы Вуйтович до Ґорлиц приіхал віцемаршалок Томаш Уринович. Бесідувал він про новы заложыня урядового проґраму Чысте Повітря і про антисмоґову постанову для Малопольщы. Цілю є, жебы до 2023 рока осягнути в Малопольщы допущальну кількіст небезпечных субстанций в повітрю, а в дальшій перспективі обнижыня іх до кількости рекомендуваной через Світову Орґанізацию Здоровля. В новым документі будут введены новы діяня, жебы скорше поправити якіст повітря. На тепер, коли приходят студенійшы дни, кількіст такых субстанций в повітрю перекрачат нормы на парусот процент, тыкат то так само Кракова, як і інчых міст, нп. Ґорлиц.

На вежу церкви в Рудній вернул зыґар

На вежу православной церкви Воздвижыня Святого Креста в Рудній вернул зыґар. По більше як двох роках зас вказує час в центральным пункті міста, царюючы над інчыма будинками. Міцно піднищеный забытковый зыґар треба было одреставрувати і піддати консервациі. Той прецизийной задачы піднял ся специялиста в обшыри консервациі рухомых памятників з Пущыкова під Познаньом. Направа коштувала 95 тис. зл. Фінансову підпору парохіі дала Ґміна Рудна та КҐГМ. Першы запискы про костел в Рудній являют ся уж в 1366 році. Теперішній вознесеный был в роках 1474-1500, а в XVI столітю добудувано од заходу вежу, на котрій містят ся годины. Костел перше хоснували як святыню євангелисты, пак католикы, а од недавна – православны вірны.

Роверострадом од Санока по Закопане?

8. лютого/фебруара в Рыманові підписано деклярациі спілпрацы для будовы біциґльовой долгодистансовой дорогы – Роверострада Солина-Закопане. Концепция закладат будову двох роверовых трас на обшыри підкарпатского воєвідства, то є Velo Karpatia i Velo San та трасы Velo Beskid i Velo Ropa в малопольскым. Траса мала бы вести од Санока через Рыманів, Ясло, Біч, Ґорлиці, Новый Санч до Закопаного. Сиґнатариі проєкту будут піднимати спільны, активны діяня, жебы заохотити самоурядовы власти, з підпором власти державы і Евросоюзу, побудувати безпечны біциґльовы дорогы з ознакуваньом і додатковом інфраструктуром. Подля стоваришынь зосередженых в деклярациі спілпрацы, побудуваня роверострады значучо влине на промоцию біциґльовой туристикы, збільшыня туристичного руху в реґіонах, а тіж причынит ся до зменшыня автомобільного руху і емісиі спалин.