Сумар дня на 12. лютого/фебруара 2026 р.

Приносиме вам сумар медияльной ґрупы ЛЕМ.фм+ на ден 12. лютого/фебруара 2026 р.

Кураторскє опроваджаня по варшавскій выставі. Тым разом тема творчости Епіфана Дровняка

Выставі «Формы присутности. Штука Лемків/Карпатскых Русинів» што кус товаришат додатковы акциі. Вчера одбыло ся тематичне опроваджаня, якє присвячене было памяти. Стрічу вюл куратор выставы др Михал Шымко. В найблизшу неділю 15. лютого/фебруара буде дальше оправаджаня по выставі. Тым разом присвячене творчости Епіфана Дровняка – Никыфора та його значыню для лемківской культуры і істориі штукы. Опроваджаня поведе Аліция Міронюк Нікольска, кураторка выставы «Никыфор. Маляр над малярами». Дрібниці о вшыткых подіях находят ся на інтернетовым сайті Державного Етноґрафічнного Музею в Варшаві.

Заповіли тогорічну дату мемориялу «Петра Ризнича Дяді»

58. Драматичный мемориял «Петра Ризнича Дяді» одбуде ся в днях 17.-26. квітня/апріля в Рускым Керестурі. Вырішыл о тым Орґанізацийный Комітет на своій стрічы 6. січня/фебруара. Тогорічный мемориял принесе публиці штырі театральны представліня для дорослых і штырі для діти. Як інформували орґанізаторы, Русиньскій народный театр «Петро Ризнич Дядя» представит ся з пєсом «Кантата про Ленку і Лазу», котрой автором і режысером є Славко Орос. Драматичне студийо «Звонимир Павлович» при Русиньскым культурным центрі в Новым Саді представит ся з пєсом «Чорный лебед», яка є роблена на мотивы тексту драматурґа, по котрым імя несе студийо, в адаптациі режысериі Славка Виная. Акторы Театру «Стеван Сремац» на мемориял придут з представліньом під назвов «Ілюзиі». Театры з Кулы і Червінкы будут мати і представліня про діти в сербскым языку. Наймолодша публика буде годна видіти і нову пєсу по русиньскы од Драматичного студия «АРТ» при Домі культуры в Рускым Керестурі. В рамках фестівалю сут плянуваны і товаришучы акциі.

Заохочаме прити до ліґницкочо Музею Міди – видіти творы Никыфора

Припоминаме, што од минулой пятниці (6. лютого/фебруара) в Музею Міди в Ліґници доступна є часова выстава творчости Епіфана Дровняка під назвом «Никыфор. Феномем саморідного таланту». То першый раз, коли Никыфор «пришол» до своіх краян – розсіяных по ліґницкым реґіоні. Експозиция представлят 50 творів, якы походят з колекциі Роберта Довгана. Вернісаж, якій одбыл ся в минулу пятницю, притягнул вельох Ліґничан, в тым представників власти міста. Взяли в ним участ м.ін. локальны самоурядовці і політикы – президент Ліґниці Мацєй Купай, бывшый секретар стану в Міністерстві Державных Активів Роберт Кропівніцкій та Ярослав Равченко, віцемаршалок нижньошлезского воєвідства. Не бракло і тых, завдякы котрым выстава была можлива – Роберта Довгана і Павла Карлика. Як раз з архіву Карликa і його жены Анны Бороды-Карлик походят представляны фотоґрафіі – з жытя, штоденности і творчой пути Епіфана Дровняка – Никыфора. Творы, што презентуваны сут на стінах ліґницкого музею, переносят головно до меджевоєнного періоду Никыфора, якій приниманый є за найліпшый етап в його творчости. На вернісажы выступила вокальна ґрупа ЛАПіТ «Кычера». Выстава буде доступна до обзераня до 30. мая тр.

В Санковій розправляно на тему ремонту будинку GOPR на Маґурі

В Уряді Ґміны Санкова одбыла ся стріча на тему ремонту будинку GOPR на Маластівскій Маґурі. Ініциятива стрічы вышла од Ядвіґы Вуйтович, віцеведучой Соймику Малопольского Воєвідства. Бесідували о приготовлінях до ремонту важного для ратунковых діянь обєкту в Низкым Бескіді. В буджеті воєвідства записано 150 тис. зл на найпильнійшы працы. В нараді взяли участ представникы ґміны, повіту, надлісництва і GOPR. Підкрислено, што модернізация є необхідна, тым барже в контексті плянуваной будовы колибы на Маґурі.