Сумар дня на 12. мая 2025 р.

Приносиме вам сумар медияльной ґрупы ЛЕМ.фм+ на ден 12. мая 2025 р.

Становиско Комісиі Нацийональных і Етнічных Меншын Сойму Польской Республикы 

В четвер 8. мая тр. принте было становиско Комісиі Нацийональных і Етнічных Меншын Сойму Польской Республикы в справі публичного зневажыня ґрупы жыдівского населіня та публичного закликуваня до ненависти на фоні нацийональных, етнічных і реліґійных ріжниц через кандидата на уряд Президента Польской Республикы европосланця Ґжеґожа Брауна. Комісия осудила скандаличны выповіди европосланця Брауна в часі президентской дебаты, трансмітуваной нажыво найвекшыма телевізийныма стациями і інтернетовыма телевізиями в квітни/апріли тр. Прямо выражали они антисемітизм і ненавист до меншыновых ґруп. Комісия, якой задачом єст хоронити респектуваня вшыткых реліґій і світопоглядів та правил толеранциі і рівного трактуваня осіб без огляду на іх етнічне походжыня і нацийональніст, выразила і занепокоіня, што ани єден журналиста не перервал выповіди Ґжеґожа Брауна ани не занял в звязку з ньом становиска. Медиі, особливо в часі выборчой кампаніі, мают обовязок стояти на стражы основных демократичных вартости і протидіяти языкови ненависти, што уняте єст в законі о радийофоніі і телевізиі. Як мож чытати в становиску: ”Польска держава мусит ся старати о антидискримінацийну едукацию і піднимати системову борбу так з антисемітизмом, як і ксенофобійом, зато каждый прояв дискримінациі меншыновой ґрупы, особливо в публичным просторі, мусит быти сурово осудженый”.

Потрібне спертя для консервациі церковных стародруків

Од парунадцетьох років Єпархіяльный Осередок Православной Культуры ”Ельпіс” в Ґорлицях веде діяня для консервациі збіркы церковных стародруків, котры походят з полудньово-східніх теренів Польщы, давной перемышльской єпархіі. Дотля повело ся охоронити перед знищыньом, забезпечыти і одновити понад 60 друків, котры в векшости были в траґічным стані. Сут то в більшости друкы вытлочены в ріжных польскых друкарнях з часів І Республикы (Львів, Кыів, Супрашль, Вільно, Перемышль). В тым році Осередок отримал дотацию з Міністерства Культуры і Нацийональной Спадковины, што покрыват 80% коштів. На жаль, Осередок не мат полной, бракуючой до запертя цілого буджету квоты. Зато звертат ся о підпору – потрібных єст іщы 10 000 злотых. В тым році мают быти підданы консервациі штырі книгы з львівскых друкарен. То Євангелия з 1665 р., Октоіх з 1671 р., якій походит з Білянкы, Осмогласник нотный з 1858 р. та Тріод Квітна з 1688 р., што походит з Ріпок. Сперти ініциятиву мож м.ін. через інтернетову колекту на плятформі zrzutka.pl – пн. ”Wsparcie konserwacji starodruków cyrylickich”. Інформациі на тему процесу консервациі і кінцьовы ефекты будут публикуваны на інтернетовым сайті Єпархіяльного Осередка Православной Культуры ”Ельпіс”.

Урядникы хотят злегшыня ограничынь в высівскых резерватах природы

Недавно в Высовій одкрыты были два резерваты природы – Козє Ребро і Марковєц-Ґрудек. Каждый з них чыслит парудесят гектарів. Як оцінила війт ґміны Устя Рускє Ева Ґарбовска-Ґура, піднесла ся атракцийніст тых місц, але в звязку з охороном природы сут даякы ограничыня. До резерватів мож войти лем вызначеныма стежками, не мож нич зрывати, ци зберати грибів. Уряд завнескувал до Реґіональной Дирекциі Охороны Середовиска, жебы мож там было іздити ровером. Окрем того хотят, жебы зимом в резерватах мож было іздити на біговых лыжах і жебы привернути там кінны шлякы. Війт рахує, же зміны войдут в жытя уж в найблизшым літнім сезоні.

Джерело фотоґрафіі: zrzutka.pl – ”Wsparcie konserwacji starodruków cyrylickich”