Сумар дня на 12. мая 2026 р.

Приносиме вам сумар медияльной ґрупы ЛЕМ.фм+ на ден 12. мая 2026 р.

Выстава «Прикликаня. Лемковина в діалоґу штукы і поколінь»

В пятницю 8. мая в Ґалериi Воєвiдского Дому Культуры в Ряшовi одбыл ся вернiсаж выставы двох артисток: Марты Криницкой-Ожех і Барбары Губерт, пн. «Прикликаня. Лемковина в діалоґу штукы і поколінь». Хоц артисткы хоснуют окремы малярскы языкы, лучыт іх рефлексия над памятю місця, досвідчыньом погранича і культурном спадковином Лемковины. Презентуваны роботы творят вельовымірову оповіст о істориі, достоменности і о тым, што минуло. Марта Книницка-Ожех в своій артистичній практиці консеквентні сігат до дідицтва Лемків. В презентуваным на выставі цикли «Прикликаня» розвиват скоршы заінтересуваня іконом, але в інтерпретациі ясно осадженій в сучасным малярскым языку. Творчiст Барбары Губерт хоснує інчу візуальну стератеґію, але так само міцно осаджену в проблематиці памяти і втраты. Артистка од років піднимат тему неістнуючых місц – бывшых сел, котры заляли під резервуар Солиньского Озера. На выставі презентує пару своiх новых малярскых циклів. Выставу в Ґалериі Воєвідского Дому Культуры в Ряшові буде мож обзерати до 31. мая того рока.

22. засіданя Рады Партнерства Пряшівского Самосправного Краю

4. мая одбыло ся 22. засіданя Рады Партнерства Пряшівского Самосправного Краю. Принесло оно схваліня новых проєктовых замірів інтеґруваных територияльных інвестиций, якы сут в цілковій сумі 3,8 млн евро і сут направлены на модернійшы культурны обєкты, поправу якости шкільництва, але і на ревітализацию історичных обєктів. Завдякы механізмови інтеґруваных інвестиций край зачал підпору про найменшы села до 500 жытелів. Медже підпореныма малыма селами сут і русиньскы Баєрівці ци Тополя. Рада Партнерства ПСК схвалила і близко 10 млн евро на канализацию і водовод в селі Збой. В Свиднику змодернізувана буде рекреацийна простір при ул. 8 мая, а в Стропкові продолжана обнова головной площы.

Зъiзд Делеґатiв Нiмецкых Соспiльно-Культурных Стоварышынь в Польщы

9. мая в Выжньошлезскым Центрi Культуры i Стрiч в Лубовiцах прошол 57. Зъiзд Делеґатiв Нiмецкых Соспiльно-Культурных Стоварышынь в Польщы, значыт, зъiзд делеґатiв нiмецкой меншыны в Польщы. На подii зобрало ся 49 делеґатiв, якы пiдсумували минулый рiк i 4-лiтню каденцию ведучого. Выбраный был тiж новый заряд i принято три новы резолюциi, новым-старым ведучым стал Рафал Бартек. Темами, якы были пiдниманы окрем евалюациi, были: ограничыня, якы сут накладаны на вчыня нiмецкого як меншынового в школах; новы плянуваны языковы стратеґii; успiхы в сферi новых нiмецко-меншыновых орґанiзаций; потреба активiзациi молодых членiв меншыны i плян дiянь на 2027 р.

Одпуст в Грабскым – святкуваня праздник блаженного Василия Гопка

В неділю 10. мая в Грабскым, рiдным селі блаженного священномученика Василия Гопка одбыл ся архієпархіяльный одпуст, посвяченый його памяти в 50 рокiв од його смерти. Головным пунктом одпусту была Архієрейска літургія, котру в церковнославяньскым языку одправлял Высокопреосвященный владыка Йона Максим, пряшівскій архієпископ і митрополита. Вєдно з ним служыл і Преосвященный владыка Курт Бурнетт, єпархіяльный єпископ Пассаіку з ЗША. Разом з нима служыло понад 30 священників. В торжестві брало участ і много монашок і вірных.

Блаженный священномученик Василий Гопко был грекокатолицкым єпископом, мучеником комуністичного режіму і вызначном персоном Грекокатолицкой Церкви на Словациі. Народил ся 21. квiтня/апріля 1904 р. в Грабскым. За свою віру і службу папі римскому был в часi тоталітного режіму вязненый і переслідуваный. Вмер 23. липця/юлия 1976 р. Вселеньскій Архієрей Йоан Павел ІІ выголосил го за блаженного в 2003 р. в Братиславі. Грекокатолицка Церков святкує його праздник 11. мая.