Сумар дня на 12. січня/януара 2023 р.

Приносиме вам сумар медияльной ґрупы ЛЕМ.фм+ на ден 12. січня/януара 2023 р.

Першы результаты повселюдного спису в Сербіі

В жолтни/октобрі 2022 р. проходило в Сербіі списуваня жытелів, котре было перенесене з 2021 р. В тых днях были опубликуваны першы його результаты, але не обнимают они іщы даных о нацийональных меншынах. З поданых інформаций выникат м.ін., што Сербія має о піл мілийона жытелів меньше в порівнаню зо списом з 2011 р. Покля в 2011 р. жыло в Сербіі 7 186 862 жытелів, в минулым році то было уж лем 6 690 887 люди. Мінусовый розділ творит 495 975 осіб. В Сербіі ся тым способом записало о 6,9% меньше жытелів. Такой во вшыткых реґіонах зменьшыло ся чысло мешканців о около 10%. Вынятком є бельградскій реґіон, де процент населіня наріс о 1,6%. Оптимістичны результаты не сут ани в Автономным Краю Войводина. Мультіетнічна част Сербіі, де жыют і войводиньскы Русины, так само в періоді од спису в 2011 р. до минулорічного списуваня стратила великє чысло жытелів. В самій Войводині є меньше аж о 182 453 жытелів. Подля остатнього спису в Войводині є 1 749 356 жытелів. В 2011 р. до русиньской нацийональности голосило ся 14 246 осіб. При цілковитым зменьшыню чысла жытелів в Сербіі мож ждати і низше чысло членів русиньской громады.

Ремонт дорогы в Маластові

Припоминаме головно тым, што іздят через Маластів – як раз в тым селі кінцьом 2022 р. зачал ся ремонт повязаный з перебудовом воєвідской дорогы но. 997. Модернізация обнимат м.ін. будову ходника в Маластові. Рух повинен одбывати ся в нормальный спосіб, кєд же роботы ведены сут на краях улиці. Завершыня прац передвидуют на початок липця/юлия 2023 р. Дорога но. 997 то єдна з головных, яка лучыт Ґорлиці з польско-словацком границьом, і веде через такы нашы села як Ропиця Руска, Маластів, Ґладышів, Ждыня і Конечна.

Завершено дальшы консерваторскы роботы в Перегримці

Як інформує Підкарпатскій Воєвідскій Консерватор Памяток в Перемышли, завершено консерваторскы роботы при выглядах в памятковій православній церкви св. Михала Архангела в Перегримці. Перед двома тыжнями уряд тот інформувал, што закінчыли ся штырілітні консерваторскы і реставраторскы працы при престолі. Деревяны вікна были підданы основным консерваторскым роботам, якы мают на ціли заховати дерево. Вікна кореспондуют з выглядом середины церкви. Сут поліхромуваны з елементами вітражів. Модернізувано і стальовы віконны краты, якы хоронят церков. Храм в Перегримці был вознесеный в 1872 р.

Коли реформа церковного календаря?

Як інформує Католицка Інформацийна Аґенция, серед грекокатоликів в Польщы фурт вертат тема зміны церковного календаря. Грекокатолицкы єпископы в різдвяным посланю заповіли реформу календаря церковных праздників, што значыт, же поєдны парохіі неодолга будут мочы самы рішати, ци остают при старым юлияньскым календари. Тема зміны календаря вертат што якісый час. Такой перед роком вірны грекокатолицкой Церкви в Польщы голосували в анкєтах што до пропозиций змін. На тот момент не знатя, як будут выглядати окремы рішыня в тій справі. Певне є єдно – для Лемків, якы часто в своіх родинах приналежат до грекокатолицкых та православных парохій, зміна календаря в єдній з церкви принесе лем дальшы поділы і клопоты.