Сумар дня на 12. жолтня/октобра 2026 р.

Приносиме вам сумар медияльной ґрупы ЛЕМ.фм+ на ден 12. жолтня/октобра 2026 р.

Вмер Мілян Мнягончак – русиньскій бізнесмен, філантроп, активіста

В четвер 8. жолтня/октобра, маючы 74 рокы, вмер в Гуменным Мілян Мнягончак, русиньскій бізнесмен, філантроп, активіста, бывшый председа Русиньской Оброды на Словациі. Был родаком з села Нижня Ядлова, свидницкого окресу. По завершыню інжынєрскых студий в Высшій Технійній Школі в Братиславі розвивал карєру в фірмі Хемкостав Гуменне, як і дакілько років в Альжырі як чехословацкій експерт. По повороті з заграниці остал акцийонером і ґенеральным директором Хемкоставу. Коли в 1989 р. пришол возродный рух Русинів, Мнягончак был єдным з основаючых членів Русиньской Оброды. Долгы рокы підтримувал русиньскый рух на Словациі, выдаваня русиньской пресы, спонсорувал і пропамятны таблиці. В тым часі занимал ся і реґіональном політиком. Был єдным з основаючых членів, а пак председом партиі Наш Край, котра мала служыти головні тому, жебы через выборы могли перейти кандидаты, занимаючы ся русинськыма інтересами і реґіоном, де жыють Русины. В 2012 році был і єдным з ініцияторів і основаючых членів Округлого Стола Русинів Словациі. Як єден з основателів стоял і коло русиньскых фестівалів в Свидику ци Гуменным. В 2014 р. был выбраный на председу Русиньской Оброды на Словациі. На Світовім Конґресі Русинів в 2015 р. выбрали го за члена Світовой Рады Русинів за Словацию. Русинів зачал в тым часі представляти і як член Выбору про нацийональны меншыны і етнічны ґрупы Рады Влады Словацкой Республикы про людскы права нацийональны меншыны і родову рівніст. Похованый буде в Нижній Ядловій. Вічна памят!

В Креници ведут ґеолоґічны досліджыня перед будовом санечкового тору

Явили ся дальшы інформациі тыкаючы будовы штучно мороженого санечково-скелетоново-бобслейового тору в Кренци. На горі Івонка ведены сут уж ґеолоґічны досліджыня, а в першым кварталі 2027 р. має быти одкрытый конкурс оферт на проєкт і позысканя позволіня на будову. Окрем того, кінцьом минулого місяця в Варшаві основана была Фундация «Тор на медаль», што має підпорити будову тору і зберати середкы на його реализацию. До спілпрацы прилучыли ся м.ін. знаны польскы спортовці. Хотят вказати, же тоты три олимпійскы дисциплины не мают власной інфраструктуры не лем в Польщы, але і парунацедтьох інчых державах медже Латвійом і Австрийом. Кошт будовы тору єст чысленый на 130 млн злотых. В рамках задачы побудуваный буде тіж спортовый комплекс з будинками, доіздова дорога і база для санечкарів. Як подал бургомайстер Крениці, інвестиция має великє значыня для будучности креницкого спорту і розвитку міста.

«Лемкы в Центрі» в Любіні

В Любіні рушыла дальша едиция фестівалю «Лемкы в Центрі». Подіі в його рамках будут проходити в тым і будучым місяци. В проґрамі фестівалю: выстава сучасной штукы, концерты церковной музикы і традицийных пісен, стірча зо свідком істориі посвячена Акциі «Вісла» та 20. едиция Варштатів Традицийного Писаня Ікон. Вступне на вышткы подіі дармо, при чым на дакотры з них обовязуют записы або дармовы білеты. Орґанізатором фестівалю «Лемкы в Центрі» єст Центр Творчых Діянь в Любіні, а партнерами: Любіньскій Повіт, Православна Парохія Святой Тройці в Любіні і Фундация Kulturolubni. Задача дофінансувана з середків Музею Істориі Польщы в рамках проґраму Патріотизм Зарани.

Джерело фотоґрафіі: Polski Związek Sportów Saneczkowych