Сумар дня на 13. грудня/децембра 2024 р.

Приносиме вам сумар медияльной ґрупы ЛЕМ.фм+ на ден 13. грудня/децембра 2024 р.

Скрижуваня на Крижівці медже Креницьом і Лабовом буде перебудуване

Ґенеральна Дирекция Державных Доріг і Автострад разом з локальныма самоурядами рыхтує ся до інвестициі на граници ґмін Лабова і Крениця. Іде о скрижуваня на Крижівці, де перетинают ся дві важны трасы – державна дорога нр 75 і воєвідска дорога нр 981. Сут тіж дві ґмінны дорогы. В місци небезпечного скрижуваня мало бы быти побудуване рондо. Як подала війт ґміны Лабова Марта Слабый, сут на етапі рыхтуваня порозумліня медже ґміном Лабова і ґміном Крениця, котре позволит сфінансувати проєкт перебудовы скрижуваня. Пак буде мож зачати інвестицийный процес. Будова ронда має на ціли поправити плынніст руху і предовшыткым безпеку в тым місци. Сут всупны пляны як мало бы выглядати рондо. Єдна версия то само рондо з прирыхтуваныма зіздами на ґмінны дорогы. Друга версия єст барже скомпликувана – в сторону Крениці мал бы іти додатковый пас, завдякы чому авта не будут гамувати під гору. В зимовым часі на тым одтинку то барз небезпечне, бо особливо при тяжкых автах з начыпами спричынят, же творят ся дороговы заторы, і авта пак мают проблем рушыти. Проєктуваня, вшелеяка документация і позволіня мали бы быти готовы до кінця 2026 р.

Неодолга выберут выконавцю документациі для розбудовы державной дорогы нр 28

Іщы єдна важна дорогова інвестиция в реґіоні єст на етапі рыхтуваня документациі. Ґенеральна Дирекция Державных Доріг і Автострад одкрыла оферты в конкурсі на зрыхтуваня документациі для розбудовы державной дорогы нр 28 од Ропы до границі малопольского і підкарпатского воєвідств. До конкурсу зголосило ся девятьох выконавців. То другій такій конкурс оферт, умова зо скорше выбраным выконавцьом была розвязана, з огляду на недотриманя ним гармоноґраму. На документацию єст перезначеных близко 8,5 млн злотых. Розбудова буде тыкала 17 км трасы. Мают ся поправити технічны параметры дорогы та безпека пішых і шоферів. Іде не лем о модернізацию скрижувань, тротуары і роверовы стежкы, але і о модернізацию віядуктів і мостів та достосуваню трасы до параметрів модерного руху. Реализация інвестициі єст плянувана на рокы 2029-2032. Ґенеральна Дирекция Державных Доріг І Автострад глядат тіж выконавців дальшых одтинків дорогы нр 28.

Різдвяный Ярмак в Высовій з концертом лемківского ансамблю Терочка

Заран, в суботу 14. грудня/децембра в Высовій (Wysowskie Krupówki) одбуде ся Різдвяный Ярмак. Його офіцийне одкрытя одбуде ся о 13.00 годині. Зараз по одкрытю подіі, о год, 13.15 з концертом выступит лемківскій діточый ансамбль Терочка. Окем того в проґрамі передвиджено варштаты творіня святочных прикрасок, ци стрічу з Миколайом і Королевом Зимы. О год. 15.00 выступит Ґалицийскій Хор з Высовой. Будут і інчы атракциі, в тым гостина і огниско. Святочны стравы прирыхтує Кружок Сельскых Ґаздынь. Будe тіж можливіст придбати сой выробы ручной роботы, яличку ци святочны прикраскы.

Лемківскій ансамбль Серенча запрезентує на концерті новы творы

Стоваришыня промоциі лемківской творчости «Серенча» просит на концерт «творча інтерпретация традициі словом і музиком». Як заявил Лемківскій Фольковий Ансамбль Серенча, на концерті буде мож почути премєровы выконаня фольк-поезиі до музикы Мирослава Боґоня і текстів поетів з Погіря і Лемковины. Концерт одбуде ся в найближшу неділю 15. грудня/децембра в Сельскым Домі Культуры в Домініковицях. Початок о 17.00 год.