Сумар дня на 13. лютого/фебруара 2026 р.

Приносиме вам сумар медияльной ґрупы ЛЕМ.фм+ на ден 13. лютого/фебруара 2026 р.

91 млн злотых для ґмін і міст сандецкого субреґіону

Бенефіциєнты ґорлицкого, новосандецкого і лимановского повітів та Нового Санча отримали 91 млн злотых з Европейскых Фондів. Промесы на проєкты звязаны м.ін. з ревітализацийом і охороном повітря вручыл віцемаршалок Вітольд Козловскій. Част ґмін отримала тіж пінязі на розвиток туристичной інфраструктуры. То м.ін. біциґльовы стежкы, котры мают быти побудуваны в Креници. Як подал бургомайстер Пьотр Рыба, Крениця має сіт роверовых стежок полученых з ґміном Мушына. Тепер хотят получыти Креницю з ґміном Лабова, тє. в страну Нового Санча, найкоротшом трасом. Роверовы стежкы будут вести од Мохначкы Выжньой через Гору Перун в сторону Чырной, Перункы, Бересту до Полян, а дальше повітовом дорогом уж в сторону ґміны Лабова. Друга промеса тыкат будовы реляксацийной пляжы в Полянях – при устю потока Камянна до потока Мостиша. Середкы отримало парунадцет ґмін і міст в лимановскым, ґорлицкым і новосандецкым реґіоні.

Санкова зачынат будову комплексу термальных басенів

Іщы в тым році в Санковій має быти готовый крытый басен. То част векшого комплексу, якого будова пляново має ся завершыти на яр 2027 рока. На початку басены будут огріваны помпами тепла, а в пізнійшых роках мают быти засиляны стабільным теплом глубокых скал, што частично спричынит іх ґеотермальный характер. Як подала війт ґміны Санкова Малґожата Малух, кошт цілого комплексу може вынести аж і 40 млн злотых – 19 млн на крытый басен, 10 млн на першый етап одкрытых басенів – водный парк. Дальшы кошты вяжут ся м.ін. з помпами тепла і достарчыньом до комплексу енерґіі з обновительных джерел ци трансформатором. Проєкт частичного схоснуваня ґеотерміі має уж потвержыня з Міністерства Климату, з котрым ґміна плянує дальшу спілпрацу. Доцільово ходит о створіня при водным парку бадавчо-едукацийного проєкту на тему ґеотерміі, котрый мал бы быти фінансуваный з зовнішніх середків.

Дальшы подіі товаришучы выставі «Формы присутности. Штука Лемків/Карпатскых Русинів»

Державный Етноґрафічный Музей в Варшаві просит на дальшы подіі товаришучы выставі «Формы присутности. Штука Лемків/Карпатскых Русинів», якы одбудут ся іщы в тым місяци. В найблизшу неділю 15. лютого/фебруара в музею одбуде ся тематичне опроваджаня, што буде присвячене творчости Епіфана Дровняка – Никыфора та його значыню для лемківской культуры і істориі штукы. Опроваджаня поведе Аліция Міронюк Нікольска, кураторка выставы «Никыфор. Маляр над малярами». В неділю 22. лютого/фебруара одбуде ся дальше опроваджаня, якє поведе куратор выставы др Михал Шымко. В остатній ден місяця, в суботу 28. лютого/фебруара буде чергове опроваджаня пн. «Іконы Лемковины», якє поведе Аґнєшка Клещ. Окрем того Музей заплянувал тіж выклад на тему Акциі «Вісла» і єй наслідств для лемківской соспільности. Выклад выголосит проф. др габ. Ґжеґож Мотыка – директор Войскового Історичного Бюра, працівник Інституту Політичных Студий Польской Академіі Наук. Жебы выслухати выклад треба одобрати безплатный білет на подію – на музейным вебсайті або в касах. Чысло місц ограничене. Дрібниці о вшыткых подіях находят ся на інтернетовым сайті Етноґрафічнного Музею в Варшаві.