Сумар дня на 13. серпня/авґуста 2024 р.

Приносиме вам сумар медияльной ґрупы ЛЕМ.фм+ на ден 13. серпня/авґуста 2024 р.

Музей Дворы Карвациянів і Ґладышів в Ґорлицях жде на модернізацию

Шіст малопольскых інституций культуры підписало інтенцийный лист в справі реновациі дворів і дворскых забудувань та пристосуваня іх до новой функциі. Серед обєктів нашлой ся і Музей Дворы Карвациянів і Ґладышів в Ґорлицях. Проєкт буде реализуваный в рамках нового проґраму «Малопольскій двір», а його цілю єст одбудуваня і достосуваня інфраструктуры до актуальных потреб жытелів. Музей в Ґорлицях в рамках реализациі проґраму плянує дві інвестициі, сут то однова і адаптация дворского комплексу в Шымбарку до полніня функцйі выставно-культуровой та модернізация ренесансового Двору Карвациянів в Ґорлицях. Як передала членкыня заряду малопольского воєвідства, Івона Ґібас, головна част проєкту «Малопольскій двір» буде реализувана в роках 2025-2027 і обнимат сім дворів з цілого воєвідства. Задачом  проєкту єст охорона і опіка над спадковином та творіня новых місц з можливістю презентациі, жытелям і туристам, культуры і спадковины реґіону. Буджет проєкту то понад 43 млн зл.

«Туристичны Бєщады» проєкт про спільне дофінансуваня

Бєщадскы ґміны будут ся разом старати о дофінансуваня. Уж два рокы тому зачали ся бесіды о основаню Стратеґіі Понадлокального Розвитку «Туристичны Бєщады». Ініцияторами сут війтове ґмін Балигород, Тисна, Команча, Ольшаниця і Солина. Як передал війт ґміны Команча, важне жебы ціла обшыр Бєщадів розвияла ся по рівно, так жебы можна было розложыти туристичный рух. Головным цілю концепциі «Туристичны Бєщады» єст діліня ся добробытом ґмін і пошырюваня місц працы, што дозволит на розвиток капіталу каждой з ґмін. На спільній стрічы в тій справі присутны бесідували тіж о актуальных проблемах. Єдным з них єст низка туристична фреквенция в Бєщадах. На бєщадскы самоуряды ждут грошы з унійных фондів, Польского Ладу і буджету підкарпатского воєвідства. Ґміны можут ся старати аж і о 15 млн зл, што має покрыти 85% заплянуваных коштів інвестициі.

Серпньовы атракциі в Риманові

Бюро Туристичной Інформациі в Рыманові просит до участи в серпньовых атракциях. В проґрамі на остатній місяц вакаций нашли ся м. ін. тематичны спацеры з туристичным провідником. Кажда з прогульок посвячена єст інчій темі, так жебы в креативный спосіб вказати історию і культуру Рыманова. Охочы будут мочы взяти участ в спацерах «шляком курортовых джерел», з лісничым по рыманівскых лісах, «Слідами жыдівской культуры по Рыманові» ци «слідами Лемків до Волтушовой». Додатково в каждый четвер в Ґалериі Штукы в Рыманові мож буде обізріти реґіональный фільм. Полный гармоноґрам атракций на тот місяц находит ся на фейсбуковым сайті Бюра Туристичной Інформациі в Рыманові, там тіж находят ся інформациі, што до можливых оплат ци резерваций.

«4 страны Карпат»

Ґорлицкій Центр Культуры при спілпрацы з Містецкым Урядом міста Ґорлиці просит на 10. едицию фестівалю «4 страны Карпат». Подія пройде 24. і 25. серпня/авґуста на ґорлицкым рынку. Через два дни в місті світла мож буде чути фолькову музику з погранича культур. Того рока на сцені выступлят ансамблі Tolhaje, Vołosi, Village Orchestra i Sokół Orchestra, котры презентуют модерный фольк. Додатково подіі товаришыт ІІ Туристичный Торг маркы Karpating, варштаты робліня медівників ци варштаты кльоцковой коронкы та деґустация реґіональных продуктів.

фот. Archiwum Urzędu Marszałkowskiego Województwa Małopolskiego