Сумар дня на 13. січня/януара 2022 р.

Приносиме вам сумар медияльной ґрупы ЛЕМ.фм+ на ден 13. січня/януара 2022 р.

Русиньска Оброда высоко оцінят просписову кампанію

11. січня/януара одбыло ся засіданя онляйн членів Выконного Выбору і Дозорной Рады Русиньской Оброды на Словациі, котре скликал і вюл председа орґанізациі Мартін Караш. Председа поінформувал членів о акциях орґанізациі вчас пандемічного періоду в 2021 р., o aктуальній ситуациі в русиньскым руху, як і влонишніх проєктах і вызванях на 2022 рік. Члены высоко оцінили проходячу в 2021 р. просписову кампанію, до котрой долучыли ся не лем русиньскы орґанізациі на Словациі, але і орґанізациі в з інчых держав, де жыют Русины, в тым орґанізациі з Лемковины і чужыны в Польщы. Подля Караша о результатах спису словацкій статистичный уряд мал бы поінформувати до кінця січня/януара 2022 р. О реализациі кампаніі, але і добрій спілпрацы русиньскых орґанізаций бесідувал і Петро Штефаняк, ведучый Округлого Стола Русинів Словациі.

Бургомайстер нагородил ведучу Стоваришыня Руска Бурса в Ґорлицях

Вчас новорічной стрічы, яка проходила 11. січня/янурара, з артистами, діячами культуры, творцями і спортовцями бургомайстер Ґорлиц Рафал Кукля нагородил выбраны особы за іх діяльніст на обшыри міста. Серед нагородженых нашла ся і ведуча Стоваришыня «Руска Бурса» в Ґорлицях і наша редакцийна камаратка, Наталия Малецка-Новак. Ведуча лемківской орґанізациі з Ґорлиц оцініня отримала за осягніня в обшыри артистичной творчости, пошырюваня і охороны культуры. В лявдациі написали, што Наталия Малецка-Новак є заанґажувана в будуваня меджекультурового діалоґу. Влони орґанізувала на ґорлицкым рынку концерт з нагоды 30. річниці реактивациі Стоваришыня Руска Бурса. Як ведуча лемківской орґанізациі діє в обшыри розвитку лемківской культуры, освіты і медий. Сердечні ґратулюєме!

Резолюця ґміны Липинкы проти LGBT скасувана

В понедільок, 10. січня/януара, Воєвідскій Адміністрацийный Суд в Кракові скасувал резолюциі анти-LGBT, котры в 2019 р. схвалили самоуряды в ґміні Липинкы і в тарновскым повіті. Постановы заскаржыл Омбудсман, якій арґументувал, же такы резолюциі сут проти Конституциі і Конвенциі о охороні прав чловека і основных свобід. В 2020 р. краківскій суд одшмарил скаргы Омбудсана, якій пак надале заскаржыл тото і остаточно Начальный Адміністрацийный Суд переказал справу до іщы єдного розпознаня. Зато в остатній понедільок воєвідскій суд в Кракові ствердил неважніст тых постанов. Суд ствердил м.і.н., же постановы мали дискримінуючый характер.

Документы розсліджынь НКВД тыкают і Русинів

Чешскій Інститут Досліджаня Тоталітарных Режімів і Західньочешскій Університет в Пльзені опубликували документы розсліджыня совітской тайной поліциі НКВД тыкаючы тисяча з близко осмох тисячів чехословацкых громадян, котры были вязнены в лаґрах вчас ІІ світовой войны. Є то м.ін. колекция документів совітскых тайных служб, котры были здобыты вчас систематичной діґітализациі в Державным Архіві Закарпатской Области Украіны в Ужгороді. Материялы были публикуваны при нагоді 80. річниці выголошыня амнестиі про Чехословаків вязненых в Совітскым Союзі. Серед документів находят ся наприклад протоколы затриманя, одбиткы пальців, фотоґрафіі, протоколы переслухань, обвиніня, вырокы судів ци інча кореспонденция. Дотепер опубликуваны документы то лем ок. 20% цілости документів, якы односят ся до чехословацкых біженців до Совітского Союзу. Документы і іх баданя мают приближыти долю незнаных жертв совітскых репресий.