Сумар дня на 13. жолтня/октобра 2026 р.

Приносиме вам сумар медияльной ґрупы ЛЕМ.фм+ на ден 13. жолтня/октобра 2026 р.

InterKult 2026 з русиністичном секцийом

В Новым Саді одбыла ся XII Медженародна Наукова Конференция InterKult 2026, посвячена інтеркультурности в едукациі. В стрічы взяли участ дослідникы, котры занимают ся ріжныма науковыма дисциплинами. Проґрам обнимал м.ін. темы звязаны з языком, літературом, історийом і медиями. В єдній з конференцийных секций представлено рефераты посвячены русиністиці. Дослідникы приближыли біоґрафію Петра Кузмяка і його родины, бесідували про значыня кєрмешу в культурі Русинів, а тіж на основі друкованых літературных творів проанализували інтеркультурны аспекты в меджевоєнній русиньскій ґазеті «Рускы новины».

Студиі з кашебского языка i лекторaт лемківского языка

По парох роках перервы Поморскій Університет в Слупску знова отверат подипломовы студиі кашебского языка. Дотепер записало ся на них пятнадцет осіб, а рекрутация іщы трыват. Університет може приняти іщы пятеро слухачів. Трисеместровы студиі сут для осіб з педаґоґічным приготовлiньом, а iх цільом є підготовити новых учытелів кашебского языка. Проґрам обнимат не лем язык, але тіж кашебску літературу, культуру і спадковину реґіону.

При тій нагоді iнформуєме, же отворена є тіж реґістрация на лекторaт лемківского языка. То выняткова шанса, жебы познати або розвинути знаня лемківского языка. Заінтересуваны можут записати ся на занятя, в вшыткы потрiбны iнформациi находят ся на сторонi Iнституту Схiдньославяньской Фiлолоґii ЯУ.

Науково-навчальна конференция «Реґіональна едукация. Язык, культура, література»

6. листопада/новембра в Інституті Нематерияльной Спадковины Карпатскых Народів в Людзьмєжы одбуде ся науково-навчальна конференция «Реґіональна едукация. Язык, культура, література», зорґанізувана Малопольскым Центром Культуры SOKÓŁ. Стріча буде посвячена роли реґіональных языків, літературы і культурной спадковины в едукациі та формуваню локальной достоменности. Проґрам обнимат наукову і практичну части. Участникы послухают рефератів м.ін. о правописі підгаляньского, діалектах як жывых языках, а тіж о хоснуваню властивых назв в реґіональній едукациі. Представникы культурных інституций і учытелі поділят ся досвідом працы з реґіональным дідицтвом. Заплянуваны сут тіж варштаты. Участ в конференциі є безплатна, але вымагана єст скорша реґістрация.

«Pneuma/Πνεῦμα» – вернісаж выставы

22. жолтня/октобра в Округовій Лікарскій Палаті в Білымстоку одбуде ся вернісаж выставы «Pneuma/Πνεῦμα», посвяченой творчости Новосiльского. На екпозициі представлена буде предовшыткым сакральна сторона його творчости. Буде мож обзерати десяткы ориґінальных рисунків, проєктів церкви, концепцийных ескізів іконостасів та архітектонічных деталів, над котрыма артиста працувал протягом свого жытя. Выставу мож буде видіти до 4. листопада/новембра тр. Вступ дармо.

VII том «Studia Sandecjana»

22. жолтня/октобра в головным будинку Музею Сандецкой Землі в Новым Санчы одбуде ся презентация VII тому выданя «Studia Sandecjana». То річник посвяченый істориі Нового Санча і Сандеччыны, в котрым публикуваны сут історичны статі, біоґрафічны нотаткы, спомины і записы о важных культурных подіях. В найновшым томі найдете тексты м.ін. о середньовічній Мушыні, істориі місцевых церкви, а тіж о візитах маляря Войцєха Ґерсона в околиці Крениці.