Сумар дня на 14. квітня 2026 р.

Приносиме вам сумар медияльной ґрупы ЛЕМ.фм+ на ден 14. квітня 2026 р.

Премii для «Потопы»

9. квiтня/апріля одбыла ся 15. церемонiя вручыня словацкых нацийональных фiльмовых премій Slnko v sieti 2025. Аж девятьох номiнаций на тiй подii дождал ся фiльм «Потопа» Мартiна Ґонды. Выняткове є тото, што был він накрученый по русиньскы i як раз о русиньскiй темi оповiдат. Хоц конкуренция не была мала, то з девятьох номінаций наконец повело ся здобыти аж шіст премій, в тым, м.iн.: Домініка Удворкова, Мартін Ґонда і Мартін Шустер здобыли премію в катеґориі Найліпшый фільмовый сценарий, Сара Хрипакова, котра в «Потопі» грала головну геройку, здобыла премію за Найліпшый женьскій акторскій выкон в головній роли, а Володимір Чема, котрый грал попа, отримал нагороду в катеґориі Найліпшый мужскій акторскій выкон в другорядій роли. Дальшы премii образ выграл в катеґориях: Найліпшый фільмовый звук, Найліпша сценоґрафія ци Премія публикы Slnko v sieti. На Словациі фiльм грали од грудня/децембра минулого рока, а в Польщы мал ся вказати в кінах в лютым/фебруарi тр. Хоц іщы не был презентуваный, надієме, же буде нагода обiзрити «Потопу» в польскых кінах.

Моденрнiзациi в ґмінi Устя Рускє

Ґміна Устя Рускє iнформує, што Соймик Малопольщы придiлил фiнансовы середкы, точно 33 300 зл, на реализацию проєкту «Малопольскы сельскы світлиці 2026». Уж тепер знаме, што тоты грошы будут схоснуваны на ремонт будинку в Iзбах. Ґміна мат провести модернiзацию елевациi i ремонт части середины, што влине на полiпшыня свiтлiці, так з вiзуальной, як i функцийной стороны, а вкiнци – на комфорт люди, котры ся там стрiчают i проводят час.

Тота сама ґміна iнформує, што в найблизшых днях, то єст 15.-17. квiтня/апріля будут перервы в доступi до електрикы – 15. квiтня/апріля в выбраных хыжах в Iзбах i од 16. до 17. квiтня/апріля в Высовiй. Перервы сут хвильовы i звязаны з модернiзацийныма працами електричной сiти. Веце iнформаций найдете на фейсбуковым профiли ґміны.

Крикуны вертают в Карпаты

Крикуны – символы Маґурского Нацийонального Парку – вертают в Бескіды. Мож iх было видіти напримiр в суботу 11. квiтня/апріля в часi екскурсиi «На привитаня крикунів», яка была орґанiзувана координатором Комiтету Охороны Орлiв. Брали в нiй участ 33 особы, котры в селi Ставиша малы шансу стрiтити першы крикуны, якы уж вернули до Польщы. Подля обрахувань з Африкы дотепер вернула лем ¼ тых птахiв, але скоро, бо ок. 15. квiтня/апріля мают прилетiти другы. Крикуны то драпіжны птахы, якы стрiтити мож правi лем в Карпатах, прото стрiча з нима є вынятковом подiйом.

Будова желiзничного лучника Ґорлицi-Заґужаны

Тырвают роботы, што мают на цiли выдiлити ґрунты пiд потенцийну будову желiзничного лучника, якій бы мал дозволити потягам на переiзды з центра Ґорлиц безпосередньо в сторону Сторожів, Тарнова i Кракова, без потребы вiзду на стацию Ґорлицi-Заґужаны. Перебудова мала бы значучо скоротити час подорожы, а тiж дати повiтови шансу на туристичный розвиток. Уж в 2023 р. PKP PLK оголосилои конкурс на опрацюваня проєктовой документациi на спомнену перебудову. Подля плянiв реализация проєкту вызначена є на рокы 2024-2027. Єднак, хоц роботи над першым етапом уж ся зачали, то перед фактичном перебудовом PKP мусит добыти 12 гектарiв земель, котры тепер належат до приватных осiб i повiту. На тот момент справом на будуче остає тото, ци желізничный лучник буде будуваный i коли тото пройде.