Сумар дня на 14. липця/юлия 2020 р.

Приносиме вам сумар медияльной ґрупы ЛЕМ.фм+ на ден 14. липця/юлия
2020 р.

З Бєщадів до Закопаного біциґльовом трасом

8. липця/юлия підкарпатскы урядникы з саноцкого і ліского повітів підписали догваріня в справі роверовой трасы з Бєщадів до Закопаного. Підписаный інтенцийный лист тыкат ся догваріня в справі «Многофункцийных Туристичных Доріг Басену Амбітной Туристикы». Ініциятива лучыт штырі думкы в єдну. Сут то біциґльова траса з Солины до Закопаного, стежка Velo San, котра проходила буде вздолж Сану, дорогове получыня Низкого Бескіду в страну Тисной та многофункцийны дорогы, котры послужат тіж біциґлистам. Новы стежкы вести будут не лем повітовыма дорогами, але тіж рільныма ци лісныма. Дорогы окрем туристичного застосуваня, будут тіж мати едукацийно-выховавчу ролю для діти і молодежы. Проєкт має на ціли створити новы туристичны пути та промувати Підкарпатя, але тіж заохочати до роверовых прогульок.

Етноґрафічный Музей в Кракові єдным з тогорічных лавреатів в конкурсі «Краків без барєр»

Конкурс «Краків без барєр» орґанізуваный Урядом Міста Краків од років уж промує практикы, ініциятивы та архітектонічны розвязаня ци проєкты дозваляючы неполносправным особам на активну участ в жытю міста і хоснувати шыроку оферту ріжных інституций. Влони орґанізаторы розшырили конкурс і так нагороджены остают уж не лем фірмы, котры достосовуют обєкты і публичный простір, але тіж думкодавці інновацийных, дослідничых проєктів ци орґанізаторы соспільных подій промуючых Краків як місто приязне непелносправным особам. Єдным з тогорічных лавреатів єст Етноґрафічный Музей в Кракові нагородженый за конкурс «Zamigaj MEK». Цілю конкурсу было найти новый спосіб вказуваня музею в польскым жестовым языку, в дакус барже зрозумілый спосіб як вказуваня буква по букві. Музейный жестовый знак выбраный был з близко 15-ох присланых зголошынь і означат традицию та поколіня.

Родинно-рекреацийный парк на Маластівскій Маґурі уж готовый

На Маластівскій Маґурі закінчыли ся роботы при будові родинного рекреацийного парку. При выжній лыжній стациі явила ся видокова плятформа, з котрой мож обзерати краєвид Низкого Бескіду. Попри находит ся шатрова колиба і місце до забав для діти, а од парку в страну верха веде стежка здоровля. Ціла обшыр єст огороджена і освітлена, з місцьом на спільне одпочываня. Буде то нова атракция ґміны Санкова, цілю котрой єст притягнути туристів не лем в зимовым періоді, але і літом. Кошт цілой інвестициі вынесе більше як піл мілийона зл.

«Погранича в обєктиві» – культура, істория, природа

Ріжнорідна культура, інтересуючы істориі і нетипова природа то головны темы акциі та фотоґрафічного конкурсу промуючого польско-словацкє погранича. Головныма орґанізаторами проєкту «Погранича в обєктиві» сут Повітове Староство в Ряшові разом з партнером зо Словациі містом Свидник. Цілю проєкту єст спільна трансгранична промоция реґіону. Зрыхтуваный орґанізаторами фотоґрафічный конкурс направленый єст головні на молодіж, а знимкы оціняны будут в штырьох тематичных катеґориях: краєвид, елементы істориі, культурны подіі і «Лиця погранича». Для першых місц орґанізаторы зрыхтували барз цікавы нагороды, сут то м.ін. професийональны спортовы камеры, а окрем того нагороджены роботы будут выданы в формі промуючого каталоґу з дописками по польскы і словацкы. Конкурсовы працы треба слати найпізнійше до вересня/септембра того рока. Більше інформаций што до конкурсу находит ся на офіцийным сайті Ряшівского Повіту. В рамках проєкту находит ся тіж реалізация фільму промуючого красу погранича. Цілю обох задач єст популяризация приграничной туристикы, а тым самым розвиток локальной господаркы. Як підкрисляют орґанізаторы, така підпора єст особливо важна в часі пандеміі, де так вельо бесідує ся о потребі підтримуваня туристичного рынку.