Сумар дня на 14. лютого/фебруара 2025 р.

Приносиме вам сумар медияльной ґрупы ЛЕМ.фм+ на ден 14. лютого/фебруара 2025 р.

Комітет Експертів Европейской Карты Реґіональных або Меншыновых Языків анализує імплементацию постанов Карты в Польщы

Як поінформувал Нижньошлезскій Воєвідскій Уряд во Вроцлаві, вчера, 13. лютого/фебруара, зачала ся там дводньова стріча Комітету Експертів Европейской Карты Реґіональных або Меншыновых Языків. То важна стріча посвячена оціні діянь Польщы для охороны і промоциі меншыновых языків. Стрічу отворила нижньошлезска воєвода Анна Жабска. Засіданя веде віцеміністер Внутрішніх Справ і Адміністрациі Томаш Шыманьскій. Серед участных сут м.ін. Ришард Ґалля, порадник Маршалка Сойму дс. Меншын, Катажына Ковнацка, директорка Департаменту Реліґійных Віроісповідань і Нацийональных і Етнічных Меншын та представникы Міністерствa Культуры і Нацийональной Спадковины, Міністерства Нацийональной Едукациі, Міністерства Наукы і Высшого Шкільництва, представникы Порадного Комітету Европейской Карты Языків та Марийоля Абкович, полномійна нижньошлезской воєводы дс. нацийональных і етнічных меншын. Експерты Рады Европы проанализуют імплементацию постанов Карты та омовлят рекомендациі тыкаючы дальшых діянь. Стріча буде нагодом до выміны досвідчынь, омовліня поступів та вызвань звязаных з охороном реґіональных і меншыновых языків в Польщы.

Підляшскій воєвода стрітил ся з представниками меншыновых орґанізаций

В минулу середу 12. лютого/фебруара підляшскій воєвода Яцек Бжозовскій стрітил ся з представниками орґанізаций нацийональных і етнічных меншын. Представникы меншыновых орґанізаций бесідували на стірчы о проблемах, дискримінациі, вызванях і осягнінях. Представили своі опініі, потребы і жаданя в обшыри меншыновой політикы реализуваной урядовом адніністрацийом на воєвідскым рівни. Як підкрислил воєвода, была то стріча о куртуазийным характері, але і глубшой рефлексиі над евентуальныма змінами в леґісляцийным контексті. Воєвода заповіл цикличны стірчы з представниками нацийональных і етнічных меншын.

Санкова выбере выконавцю одкрытых басенів

В Санковій тырват анализа оферт выконавців на будову комплексу одкрытых басенів. Конкурс оферт был оголошеный іщы літом минулого рока, але одкрытый был аж на початку того місяця. З огляду на великы кошты інвестиция буде поділена на два етапы. Найнизша зголошена оферта то нецілых 7 млн злотых, а найвысша понад 21 млн. Ґміна має тридцет дни на розсмотріня оферт. Выбраный выконавця буде мал на реализацию задачы тридцет місцяців. Як подала війт Малґожата Малух, працы повинны рушыти барз скоро, бо ґміна має уж полну документацию з позволіньом на будову. Єдночасно ґміна завершыла конкурс оферт на замонтуваня на обшыри цілого комплексу помп темпла, што має коштувати близко три мілийоны злотых.

Ґміна Ропа выдаст веце на інвестициі

Ґміна Ропа выдаст в тым році на інвестициі близко 20 млн веце як все. Як подал війт Кароль Ґурскій, буде то можливе завдякы зовнишнім дотациям. Завдякы середкам з Польского Ладу буджет збільшыл ся з квоты ок. 40 млн злотых до близко 61 млн злотых. В рамках тых середків ґміна зреализує чысленны інвестициі і соспільны проґрамы. В плянах єст завершыня сіти водопроводів, ґмінных доріг ци будова ґімнастичной салі в Лоси.