Сумар дня на 14. жолтня/октобра 2026 р.

Приносиме вам сумар медияльной ґрупы ЛЕМ.фм+ на ден 14. жолтня/октобра 2026 р.

Одышол великій патріота Лемковины – Адама Барна

З великым жальом повідомляме, што на 100 році жытя вмер Адам Барна, долголітній церковный діяч, писатель і документалиста долі Лемковины. Адам Барна одышол 12. жолтня/октобра, лишаючы по собі богатый доробок, котрый для многых є безцінным джерелом знаня о істориі і культурі Лемків. Вродил ся Адам Барна в 1926 році в селі Чорне. Як молодый чловек досвідчыл драматів ІІ світовой войны, а потім выселінь. По выгнаню на західні землі оселил ся в Ліґници, де через десяткы років діял в реліґійным жытю лемківской спільноты. Был єдным з найстаршых жыючых православных дяків в вроцлавско-щеціньскій єпархіі. Особливе місце в його жытю занимала писательска діяльніст. Опубликувал парунадцет книжок, споминів і опрацувань посвяченых істориі Лемковины, долі выселенців і діям поєдных місцевости реґіону. Был автором або спілавтором моноґрафій такых місцевости як Чорне, Ізбы, Білична, Боґуша ци Перунка. Документувал тіж реліґійне жытя Лемків по выселінях. Дякуючы його працы удало ся охоронити од забытя вельо реляций свідків істориі, локальных традиций і фактів, што тыкают істориі і культуры Лемків. Для наступных поколінь лишыл выняткове свідоцтво світа, котрый перестал уж істнувати. Заупокійна Літургія буде одслужена в пятницю о год. 9.30 в церкви в Ліґници. Вічна Йому памят.

Нове авто для осередка Елеос в Ґладышові

Варштаты Терапіі Занятями, котры веде Православный Осередок Молосердя Елеос в Ґладышові, мают новый автобус, што єст пристосуваный до перевожыня осіб з неполносправностями. Авто повело ся купити завдякы дофінансуваню з Державного Фундушу Регабілітациі Неполносправных Осіб в высокости 380 тис. зл, котре позыскал Ґорлицкій Повіт. Новый, 24-особовый бус, уж єст хоснуваный через выхованків варштатів терапіі занятями. Торжественне посвячыня авта прошло 12. жолтня/октобра. Церемонію провюл архієпископ перемышльскій і ґорлицкій Паісий. В подіі участ взяли м.ін. староста ґорлицкій Мирослав Вальонґ, війт ґміны Устя Рускє Ева Ґарбоска-Ґура, представникы Повітового Центра Помочы Родині та директор осередка Елеос о. Мирослав Цідило. Підчас стрічы дякувано вшыткым особам, котры были заанґажуваны в здобытя грошів і реализацию інвестициі. Підкрисляно тіж значыня діяльности осередка Елеос, котрый підперат не лем мешканців ґорлицкого повіту, але тіж особы, што потрібуют помочы споза реґіону.

Воды не бракне?

В Климківці єст рекордово мало воды. В резервуарі остало кус веце як 3 млн кубиків воды, што означат, же єст выполненый лем в парох процентах. Як подає Радийо Краків – власти міста Ґорлиці успокаяют, што неє загорозы, кєд іде о доставу воды для мешканців. Самоуряд рыхтує аварийный плян на выпадок продолжаючой ся сушы. Роздумуют м.ін. будувати глубокы студні, котры будут додатковым джерелом воды для міста. Ґорлиці рахуют тіж на зміны в ґаздуваню водом через Польскы Воды, што мало бы позволити затримати векшу кількіст воды, коли єст сухій період. На тот момент ограничено роботу водной електровні, жебы зменшыти одплыв воды. Ситуацию набіжучо моніторуют містны службы.

Русиньскы активісты на стрічы в братиславскым владыком

Актуальный і бывшый председа Округлого Стола Русинів Словаці Мілян Ян Піліп і Петро Штефаняк стрітили ся з Його Преосвященством владыком Міляном Лахом, братиславскым єпархом. Темом стрічы была предовшыткым роля Церкви при захованю нацийональной достоменности, языка і культурной ідентичности, не лем серед Русинів на Словациі, але і дальшых нацийональных соспільности ци Словаків і Русинів згараницьом. Владыка Мілян Лах має в тій темі особисте досвідчыня в роботі загранцьом. Отже в роках 2018-2023 был єпархом Русиньской Грекокатолицкой Єпархіі в Пармі, в ЗША, был тіж помічным єпископом Братиславской Єпархіі і од марця 2026 р. є братиславскым єпархом. Был тіж апостольскым візитатором про грекокатолицкых вірных зо Словациі в західній Европі.