Сумар дня на 15. липця/юлия 2025 р.

Приносиме вам сумар медияльной ґрупы ЛЕМ.фм+ на ден 15. липця/юлия 2025 р.

Што ся стане з трьома медведями в Бєщадах?

Медведі з Бєщадів можут быти перенесены до Татряньского Нацийонального Парку – то пропозиция віцеміністра климату і середовиска та головного консерватора природы по отриманю через ґміну Тисна згоды на одстріліня трьох медведів. Позволіня на одстріл выдала Ґенеральна Дирекция Охороны Середовиска в першым тыжни липця/юлия. Дирекция підкрислила, што дозволіня на одстріл звірят то остаточне розвязаня, бо інчы формы, такы як одстрашаня ци іманя медведів не принесли жаданых результатів. Позволіня єст важне до кінця 2026. Віцеміністер середовиска і климату та головный консерватор природы вышли з ідшйом перенести медведі в Татры, вымогом єст формальне выцофаня зложеных ґміном документів позваляючых на одстріліня. Такє розвязаня єст єднак шыроко критикуване природниками і еколоґіами, котры підкрисляют, што не розвяже то проблему, а лем го перенесе. Звертают тіж увагу, што згідні з опініями експертів головныма причынами конфлікту медже тыма звірятами а людми сут злі забезпечены одпады та брак консеквентной політикы одстрашаня і едукациі, і в тых обшырях пропонуют глядати розвязань.

Антисеміцкы вандализм в Дукли, знищены сут мурі синаґоґы і памятник

В Дукли в ночы з 11. на 12. липця/юлия дошло до акти вандализму на антисеміцкым фоні. Закля што незнаны сут злочынці, якы написали на мурі XVIII-вічной синаґоґы вульґарны окрисліня направлены на жыдівску діаспору. Знищеный єст тіж памятник находячый ся при жыдівскым цмонтери, вандалі прібували написати слово «Палестина», ниже намалювали свастику. О тій ситуацйі поіформувало Стоваришыня Штетль Дуля, котре занимат ся охороном жыдівской спадковины в реґіоні. Орґаізация высловила своє обуріня і потупила злочынців, а о цілій ситуациі поінформувала поліцию. Додатково члены Стоваришыня запропонували вандалям участ в історично-едукацийных варштатах. Як підкрислили в своім комунікаті, знаня зменшат страх і може быти дорогом до діалоґу, зміны поставы і більшой отвертости.

Зачал ся ремонт дорогы з Радошыц до границі зо Словацийом

Іде о воєвідску дорогу но. 892 з Радошыц, в саноцкым повіті, аж до границі державы зо Словацийом. Інвестиция єст реализувана в рамках проґраму Interreg Польща-Словация «Лучыме погранича Східніх Карпат». По словацкій страні з отриманой пулі середків забезпечат осувиско та выремонтуют дорогу до Малой Поляны коло Стропкова. Як передал директор Підкарпатского Воєвідского Заряду Доріг, ремонтувана пут но. 892 не має великого значыня, як іде о транзит, але єст барз важна для прожываючых по обох странах границі люди, котры хоснуют ю наштоден. Кошт інвестициі то коло 6 млн зл, а сам ремонт має ся закінчыти перед майом 2026 рока.

«Од Русаль до Яна» в Зындрановій

Музей Лемківской Культуры в Зындрановій, як што рока, просит на свято лемківской традициі і культуры «Од Русаль до Яна». Подія пройде в остатній вікенд липця/юлия. В проґраміі находят ся ріжного рода атракциі, такы як звиджаня музею, прелекциі ци промоция книжок. Ціліст дополнит музична част, де на сцені запрезентуют ся ансамблі з Польщы і Словациі.