Сумар дня на 15. лютого/фебруара 2022 р.

Приносиме вам сумар медияльной ґрупы ЛЕМ.фм+ на ден 15. лютого/фебруара 2022 р.

В Команчы мают думку на музей з лемківскыма гафтами

Якісый час тому інформували сме о колекті зорґанізуваній Стоваришыньом Підпоры Локальных Ініциятив Команчы «Волк». Тыкала она зобраня 70 тис. злотых на выкупліня і затриманя в Команчы колекциі Дариі Боівкы. Находят ся в ній ручні гафтуване облечыня з ріжных сел в ґміні, пацюркова біжутерия ци давны ґратя. Збірка рахує понад 50 елементів і окремо велику кількіст сучасных гафтів. Дария Боівка не лем колекцийонувала, але тіж одкрыла приватну Ізбу Памяток, завдякы чому вказувала свою збірку і припоминала о материяльній культурі Лемків. На жаль, по єй смерти не было охочых, жебы дальше вести Ізбу. Колекцию одкупило Братство Грекокатолицкой Молодежы Сарепта разом зо Стоваришыньом Підпоры Локальных Ініциятив Команчы «Волк». Тепер обі орґанізациі та ґміна Команча разом з осередком культуры думают над выекспонуваньом спадковины і підтриманьом давной штукы. В плянах мают одкрыти музей або ізбу памяти, де будут орґанізувати варштаты і ріжного рода атракциі. Така єдиниця буде припоминала о выселеных в рамках акциі «Вісла» жытелях ґміны Команча.

Ближыт ся будова історичного парку в Сярах

До 1. марця охочы выконавці можут складати оферты на будову історичного парку в Сярах. В минулым році ґміна Санкова разом з партнерском ґміном зо Словациі, Нижньом Полянком, підписали догваріня на реализацию проєкту «Вратувати од непамяти». Цілю проєкту єст охорона культуровой спадковины, але тіж зміцніня і розвиток обшыри погранича. В рамках проґраму находят ся м.ін. одновліня цмонтерів з періоду І світовой войны ци будова історичного парку. Парк буде поділеный на пару секторів. Найдут ся в ним сенсорична стежка, мультімедияльны ґратя, хыжкы для птахів ци макєта ґміны Санкова, з зазначеныма характеристичныма пунктами в ґміні. Додатковом атракцийом буде выкорыстаня находячых ся на обшыри парку фраґметнів окопів, котры будут одтворены, так жебы презентували ся як за часів войны. В проєкті находит ся тіж м.ін. будова сонечного зыґаря.

Популяция жубрів в Бєщадах дале загорожена

Влони Ґенеральна Дирекция Охороны Середовиска выдала згоду, жебы одстрілити до 40 хворых жубрів в Бєщадах. Причыном єст телязіоза – тяжка хворота, котра кінчыт ся сліпотом жубрів. Одстріл не розвязал єднак проблему хворых жубрів, а што гірше лісничы заобсервували, же обшыр выступуваня хвороты розшырят ся. Тепер Реґіональна Дирекция Державных Лісів отримала дальшы позволіня на елімінацию хворых єдниц, уж во вшыткых бєщадскых надлісництвах. Ситуацию обсервуют науковці, котры апелюют, же справа єст серіозна і горозит сохраніню бєщадской популяциі жубрів. Обшыри надлісництв Ступосяны, Лютовиска, Балигород, Ліско, Команча ци Тисна то єдины в Польщы місця, де прожывают дикы стада жубрів низинно-кавказкой леніі. Стратеґія охороны жубрів має основу в будуваню вельох, але малых стад, а днес в Бєщадах, як і в інчых місцях Польщы жубры выступуют в невельох барз чысленных. З той причыны як захворіє єдниця, хворіє і ціле стадо.

В Ґорлицях добрый стан повітря?

В остатніх двох тыжнях в Ґорлицях ведены были досліджыня тыкаючы чыстоты повітря. В рамках акциі «Посмотр, чым дыхаш. Змін тото» на ґорлицкым рынку поставлено інсталяцию ключів, задачом котрых было міряти чыстоту повітря. Результаты сут барз добры, штучны ключы лем легко зробили ся сіры. Як пояснят екодорадця при уряді міста в Ґорлицях, результаты не сут до кінця згідны з правдом. В часі тырваня досліджыня міцно дуло, што влияло на досліджыня. Додатково місто на самым рынку, де была поміщена інсталяция ключів, має мало высокоемісийных джерел тепла. Єднак повітря в Ґорлицях не єст зле, чому доводят і інчы досліджыня проведены влони.