Сумар дня на 23. червця/юнія 2026 р.

Приносиме вам сумар медияльной ґрупы ЛЕМ.фм+ на ден 23. червця/юнія 2026 р.

Выстава фотоґрафіi «Лемкы 2026»

Од 17. до 26. червця/юнія в Краковi в Ґалериi Штукы А1 доступна є нова фотоґрафічна выстава «Лемкы 2026». Єй авторами сут Ян Курек і Єжы Сільберінґ, котрых артистична спiлпраца тырват уж долгы рокы. В своiх фотоґрафіях, мимо iнчого пiзриня на образ, творят єдну, спійну iсторию о свiтi Лемкiв – о памяти, чловеку i натурi та о духовости. Ведучом темом выставы сут контрасты медже памятю а сучасностьом – тишына выселеных сел, релiґiйны символi, традицийне облечыня, а тiж реляция чловека з краєвидом Карпат. Выстава оповiдат о культурi, котра мимо iсториi выселiнь фурт жыє i хоронит свiй язык, музику i духовiст.

Центр Досліджынь Нацийональных і Етнічных Меншын в Білымстоку

В Польщы, на Університеті в Білымстоку отворено нову наукову єдиницю – Центр Досліджынь Нацийональных і Етнічных Меншын. Центр має занимати ся науковыма досліджынями, документацийом культурового дiдицтва та підпором спілпрацы медже науковцями і представниками меншын. З нагоды отворіня Центру, вчера, 22. юнiя/червця, одбыла ся перша наукова конференция, «Нацийональны і Етнічны Меншыны в Польщы – сучасны дослiднiчы контексты i перспективы розвитку». Подія зобрала вельо дослідників, студентів i осiб заанґажуваных в справы меншын з цiлой державы.

«Формы присутности. Штука Лемків/Карпатскых Русинів» – послiднiй тыжден

Припоминаме, што iщы лем тыжден мож обзерати выставу «Формы присутности. Штука Лемків/Карпатскых Русинів» в Державным Етноґрафічным Музею в Варшаві. Експозиция буде доступна до 30. червця/юнiя. Для тых, котры не знают – є то перша така выстава, де публична, державна інституция в такым вымірі вказує русиньску штуку. Найдете на нiй роботы найвекшых і найславнійшых русиньскых артистів, як Енді Варголя, корифеів русиньской підкарпатской школы малюваня – Адальберта Ерделі ци Йосифа Бокшая і іх выхованків, славного Ореста Дубая, ґеніяльных Юрия Новосільского і Епіфана Дровняка (Никыфора), а тіж вельох професийных і непрофесийных жыючых i нежыючых артистів з Польщы, Украіны, Словациі, Сербіі, Мадяр ци Пiлнiчной Америкы.

Карпатскiй реґіон – рекрутация уж тырват !

Од 1. червця/юнiя до 9. липця/юнія на Ягайлоньскым Університетi в Кракові тырват рекрутация на напрям студий Карпатскiй реґіон: етнолінґвістика і культурны студия. Скєруваный він є для осіб, якы сут заiнтересуваны языками, історийом, літературом, музиком і культуром держав карпатского реґіону. Студия дают можливіст познати культурну ріжноріднiст Карпат, історичны процесы формуючы тот простір, а так само спільны і окремы традициі в Польщы, Украiнi, Словациi, Румуніi, Чехах i на Мадярах. В рамках проґраму мож ся вчыти словацкого і украiньского языків, а тiж записати ся на факультативный лекторат лемківского языка – єдиный такiй курс на унiверситетскым рiвни в Польщы. Занятя ведут науковці з ріжных катедр і інститутів, м.ін. філолоґічных, етнолоґiчных і реліґійознавчых, што дає тым студиям iнтердисциплінарный характер. В рамках напряму ведены сут тiж тереновы досліджыня в карпатскых реґіонах Польщы і за єй границьами. Iнформациi на тему Карпатского реґіону мож найти на сторонi Iнституту Схiдньославяньской Фiлолоґii Ягайлоньского Університету.