Сумар дня на 15. мая 2025 р.

Приносиме вам сумар медияльной ґрупы ЛЕМ.фм+ на ден 15. мая 2025 р.

В Римі проходил Ювілей Східніх Католицкых Церков

В Римі од 12. до 14. мая проходил тридньовый Ювілей Східніх Католицькых Церкви. То тринадцетый з головных етапів Ювілейного Рока 2025, якій до Вічного Міста притягнул приблизно пят тисячів поломників і представників ріжных східніх церкви – патріархів, митрополитів, єпископів з цілого світа. Як інформувал порталь Vatican News, участникы пришли м.ін. з такыx держав як Італия, ЗША, Украіна, Іспанія, Франция, Бразилия, Арґентина, Мексик, Канада, Пакістан, Колюмбія ци Банґлядеш, жебы вєдно одсвяткувати свою єдніст з наслідником Петра. В Ювілею брали участ і представникы русиньской традициі – єпископы зо Словациі, Мадяр, Хорвациі. Сама мукачівска єпархія має як раз в тым часі своє офіцияльне поломництво до Риму в рамках Ювілейного Рока. Головным пунктом ювілею была вчерашня авдиєнция в Святійшого Отця Лева XIV, яка одбыла ся в Авли Павла VI. Пак в Базиліці св. Петра была одслужена Божеска літургія в візантийскым обряді.

В суботу в Явожні упамятніня лемківскых жертв 

В найблизшу суботу 17. мая в Явожні, з ініциятивы креницкого православного пароха з Крениці – о. Петра Пупчыка, пройдут упамятніня жертв явожняньского лаґру – Центрального Лаґру Працы Явожно, в якым, медже інчыма, вязнены і мучены были Лемкы. При лемківскым памятнику буде одслужена о 13.00 год. панахіда. Присутны будут делеґациі Лемків з гір і з заходу. Явожняньскій памятник был одкрытый в 2017 р. в рамках упамятнінь 70. річниці акциі «Вісла». Видно на ним інскрипцию в трьох языках, в лемківскым, польскым і анґлицкым, котра звучыт: «Вязненым і страдавшым / в лаґрі в Явожні / в наслідстві акциі «Вісла» Лемкам – Потомны. Лемківскє упамятніня жертв явожняньского лаґру поставлене было по долгых роках систематичного фальсифікуваня лемківской істориі, поменшаня лемківского терпліня і неспоминаня на Лемків – вязнів явожняньского лаґру двох тоталітаризмів. Поставліня памятника лемківской спільноты то в найвекшій мірі заслуга проф. Олены Дуць-Файфер і єй спілпрацы з локальныма властями.

Mіністра порушыла справу підручників для меншын

«Нове розвязаня, котре бы зобовязало міністра едукациі, жебы полнил ролю выдавці підручників для меншыновых соспільности, вымагало бы сутьовых змін, в тым заґарантуваня одповідньой кадры, а тіж правных і орґанізацийных можливости» – поінформувала віцеміністра едукациі Катажына Любнауер. Омбудсман зголосил ся до Міністерства Нацийональной Едукациі зо звіданьом в справі підручників для нацийональных і етнічных меншын. Як пояснило Бюро Омбудсмана, нацийональны меншыны од років складают скаргы, з котрых выникат, што іх проблемом єст брак підручників і інчых едукацийных материялів для вчыня. О проблемі бесідувано м.ін. вчас засіданя Спільной Комісиі Уряду та Нацийональных і Етнічных Меншын та соймовой Комісиі Нацийональных і Етнічных Меншын. В одповіди на звіданя Омбудсмана што до діянь, котры піднимат Міністер Едукациі, Катажына Любнауер м.ін. пояснила, што Міністер лем допущат до хоснуваня підручникы і не ініциює діянь звязаных з іх опрацовуваньом. Міністра підкрислила необхідніст діалоґу з представниками меншын в ціли розвязаня являючых ся проблемів.

Свято блаженного Василия Гопка

Праздник блаженного священномученика Василия Гопка, помічного пряшівского єпископа, в остатню неділю 11. мая святкували в Катедральным Соборі св. Йоана Крестителя в Пряшові торжественном архієрейском літургійом, котрой головным служытельом был митрополита Йона Максим, якій мал і проповід. На кінци літургіі был одслуженый Молебен до блаженного Василия при його мощах в бічній каплици катедры. Єднако вчас минулого вікенду в Грабскым, рідным селі священномученика, проходил при нагоді того праздника архієпархіяльный одпуст.