Сумар дня на 16. червця/юнія 2025 р.

Приносиме вам сумар медияльной ґрупы ЛЕМ.фм+ на ден 16. червця/юнія 2025 р.

Прошол XVIIІ Світовый Конґрес Русинів

13. і 14 червця/юнія в просторах румуньского парляменту в Букарешті прошол XVIIІ Світовый Конґрес Русинів. Орґанізатором тогорічного конґресу было Культурне Товариство Русинів Румуніі. Присутны были делеґациі з вшыткых членьскых держав – Польщы, Словациі, Украіны, Румуніі, Мадяр, Чешской Республикы, Сербіі, Хорвациі і Пілнічной Америкы (Канада і ЗША). Лемковину репрезентували члены Стоваришыня Лемків і Стоваришыня «Руска Бурса» в Ґорлицях. Засіданя было одкрыте гымнами і молитвом. По святочных приговорах почесных гостів одбыло ся вручыня нагорід. Лавреатом Преміі Василя Турока-Гетеша за тот рік стал Франциск-Оскар Ґаль з Румуніі, за «досягнуты вызначны результаты при розвитку, досконаліню і презентациі русиньской культуры во вшыткых єй аспектах». Лавреатом нацийональной преміі за русиньскє уменя імени Івана Манайла Pro Arte Ruthenorum 2025 остал Михаіл Белень з Підкарпатя, вызначный русиньскый артиста, скульптор, ґрафік. Світова Рада Русинів передала і Почестны грамоты для тых, котры много років активны сут в русиньскым руху, і дали великій вклад в розвиток Русинів. В рамках робочой части была справоздана діяльніст Світового Конґресу Русинів і його членьскых орґанізаций за послідні два рокы. Справопис з діяльности Стоваришыня Лемків і Руской Бурсы в Ґорлицях представила проф. Олена Дуць-Файфер. В пятницю одбыло ся тіж засіданя XII Світового Форуму Русиньской Молодежы. Ден завершыл ся артистичным проґрамом.

Світовый Конґрес Русинів в резолюциі жадат, жебы акция «Вісла» была признана як беззаконна

В суботу 14. червця/юнія Світовый Конґрес Русинів продолжал пленарным засіданьом. Делеґаты дискутували на тему вопросу выбераня председы Світогового Конґресу Русинів та членьскых орґанізаций. Засідали і окремы конґресовы комісиі. Пак делеґациі з поєдных держав выбрали представників до складу Світовой Рады Русинів. Было і голосуваня на председу Світового Конґресу Русинів. Остал ним на дальшый період Штефан Лявинец. Делеґаты пак потвердили на дальшый період секретаря СКР Володиміра Противняка і прес-секретаря Петра Медвідя. На кінци делеґаты XVIII Світового Конґресу приняли резолюцию і узнесіня. В резолюциі зас сут пункты, котры дотуляют ся вызнаня Русинів в Украіні, і ґарантуваня іх прав. Конґрес так само жадат, жебы Польща вызнала акцию «Вісла», в рамках котрой были насильно і беззаконно выселены Русины з Лемковины.

«Давна Бойківщына і Лемковина в обєктиві Романа Райнфуса»

В найближшу суботу 21. червця/юнія в Бєщадскым Центрі Культурной Дідовизны FANTO в Устриках Нижніх одбуде ся чергова стріча з циклю Бєщадска Академія. Тым разом стрічу поведе др Губерт Оссадник, а темом буде «Давна Бойківщына і Лемковина в обєктиві Романа Райнфуса». Стріча зачне ся о 18.00 год.