Приносиме Вам сумар медияльной ґрупы ЛЕМ.фм на ден 16. липця/юлия 2019 р.
Свобідный приступ до вшыткых річників тыжденника «Лемко»
Нацийональна Бібліотека в Польщы дала свобідный приступ до вшыткых річників соспільно-культурного тыжденника «Лемко», якы находят ся в Ягайлоньскій Бібліотеці в Кракові. На зъізді в Саноку 8. грудня/децембра 1933 р. лемківскы діячы основали Лемківскій Союз, де, як написали в вводным слові до першого чысла новой ґазеты, «мают зґрупувати ся вшыткы Лемкы і выдавати ґазету Лемко». Тыжденник был печатаный в роках 1934-1939 р. як офіційный орґан Лемко-Союза. За першы два рокы ґазета печатана была наперед в типоґрафіі Осипа Стыфі в Перемышли, пак в типоґрафіі Будуче в Креници, а од кінця 1936 р. в типоґрафіі А. Ґольдмана во Львові. Од перешых номерів головным редактором «Лемка» был Василь Тыліщак, потім Гарасим Громосяк, а од 1939 р. Методий Трохановскій. «Лемко» од самого початку давал си за ціль дотримувати прорусиньскы нацийональны погляды і будувати значучу політичну позицию Лемко-Союза. Зато в часописі мож найти не лем темы, якы тыкали ся діяльности Лемко-Союза, але і паралельні одродженых нацийональных русиньскых інституций – Апостольской Адміністрациі Лемковины, лемківскых шкіл і окремых культурно-освітовых інституций, головно Руской Бурсы в Ґорлицях ци сіти чытален ім. Качковского.
Талергофскій Ден Памяти в ЗША
Русиньска еміґрацийна орґанізация Лемко-Союз просит 3. серпня/авґуста на Талергофскій Ден Памяти, котрый пройде в Гіґанам в штаті Коннектікет в ЗША. Проґрам тогорічных упамятнінь зачне ся бесідом про діяльніст днешнього Лемко-Союза і інчых русиньскых орґанізаций в Америці. Споминове слово буде і на Карпаторусиньскє Общество в ЗША, і Карпатскій Інститут в Гіґанам, якій веде проф. Поль Бест. Дискусия про соспільну діяльніст еміґрантскых орґанізаций одбуде ся в бібліотеці Інституту, в котрій находит ся много цінных публикаций, памяток і артефактів зо збіркы давного Лемко-Союза. По годинній презентациі в проґрамі єст панихіда памяти жертв. Богослужыня одбудут ся в каплици побудуваній на обшыри Інституту. По споминовій части орґанізаторы кличут і на русиньскій пікнік. Вчас подіі буде можніст придбати русиньскы выдавництва, як і отримати дармовы примірникы деякых лемківскых книжок.
«Фолькове граня» з Оркєстром св. Миколая
Оркєстра св. Миколая, яка уж од парунадцетьох років розславлят м.ін. лемківску народну музику серед польской і світовой публикы, просит на концерт пн. «Фолькове граня», котрый одбуде ся 10. серпня/авґуста в Старій Кузни в Єдлічах. Концерт зачне ся о 19.00 год., а ансамбль выступит в складі Анна Колодзєй – гушлі, спів, Яцек Варшава – перкусия, Збишек Ковальчык – басова ґітара, спів, Марцін Скшыпек – ґітара, мандоліна, цимбалы, спів, та Боґдан Браха – гушлі, дудкы і спів. Вступ на концерт дармо.
Коментарі