Сумар дня на 16. лютого/фебруара 2026 р.

Приносиме вам сумар медияльной ґрупы ЛЕМ.фм+ на ден 16. лютого/фебруара 2026 р.

Лемко покликаный до Рады Будучности – дорадчого орґану Премєра Польской Республикы

10. лютого/фебруара в Варшаві прошла подія покликаня Рады Будучности. Bуде она дорадчым орґаном Премєра, готуючым рекомендациі діянь і рішынь, якы мают підтримувати дальшый розвиток Польщы. До Рады вошло 19 осіб – в тым Міністер Фінансів і Господаркы Анджей Доманьскій, якій буде вюл працами, та представникы світа бізнесу і наукы. Серед запрошеных до спілпрацы Премєром Дональдом Туском нашол ся Лемко з Ганчовы – Ярослав Королівскій, презес і спілоснователь компаніі Synerise – єдной з найбільше заавансуваных технолоґічных фірм в Европі. До Рады Будучности вошли тіж такы особы як Славош Узнаньскій-Віснєвскій (Астронавта Европейской Космічной Аґенциі, першый Поляк в істориі, што перебывал на Медженародній Космічній Стациі), Стефан Баторы (основатель аплікациі Booksy) ци Томаш Конік (презез Deloittе в Центральній Европі, ініциятор Фундациі Deloitte в Польщы). Ярослав Королівскій, окрем того, што є головным директором компаніі Synerise, єст тіж дослідником і выкладовцьом Технічного Університету в Кракові (AGH). Од квітня/апріля 2020 р. был спілвластительом футбольовой компаніі Вісла Краків, а актуально є векшыновым акцийонером і презесом клюбу. Являт ся приватным спонсором локальных клюбів і ініциятив. Компанія Synerise творит опроґрамуваня, якого основом є штучна інтеліґенция (АI) та big data. Быват присутный і в лемківскым середовиску. Веце на тоту тему прочытате в дописі на нашым портали.

Президент Польшы заветувал уставу вызнаючу шлезскій реґіональный язык

Президент Кароль Навроцкій заветувал уставу вызнаючу шлезскій як реґіональный язык. Устава была другом в тій каденциі Сойму, а в сумі девятом леґісляцийном пробом в тій справі. Сойм схвалил уставу вызнаючу шлезскій як реґіональный язык 9. січня/януара. До президента трафила по працах в Сенаті, котрый 21. січня/януара рішыл, же не вымагат она поправок. На основі уставы шлезскій язык мал быти вписаный до закону о нацийональных і етнічных меншынах як другій, попри кашебскым языку, реґіональный язык. Дало бы то можливіст введіня до шкіл занять зо шлезского языка, монтуваня двоязычных таблиц з назвами місцевости, дофінансуваня задач звязаных з сохраніньом шлезского языка ци долучыня до Спільной Комісиі Уряду та Нацийональных і Етнічных Меншын двох представників соспільности хоснуючой шлезскій язык. Підчас повселюдного спису з 2021 р. шлезску нацийональніст задеклярувало понад 596 тис. осіб, а хоснуваня шлезского языка в домашніх контактах потвердило понад 467 тис. осіб.

В Пряшові припомянули собі 20 років од смерти митрополиты Николая

Як інформувало Пресове Одділіня Уряду Пряшівской Православной Єпархіі, Його Блаженство Ростислав, архієпископ пряшівскій і митрополита Чешскых Земель і Словациі одслужыл 1. лютого/фебруара тр. в Катедральным Соборі святого князя Александра Невского в Пряшові торжественну літургію, котра была присвячена споминови на 20. річницю одходу на вічніст архієпископа пряшівского і митрополиты Чешскых Земель і Словациі – владыкы Николая. Владыка Ростислав одслужыл літургію вєдно з настоятельом катедрального собору митрофорным протоєрейом Михалом Швайком, єрейом Міляном Петриском і архідіаконом Максимом Дурілом. Митрополита Николай, світскє імя Николай Коцвар (1927-2006), был родаком з села Ганиґовці, сабиновского окресу. Під його ведіньом по політічных змінах з 1989 р. православна Церков збудувала 78 новых храмів. Веце на тоту тему прочытате в дописі на нашым портали.

фот. www.gov.pl | Канцелярия Презеса Рады Міністрів