Сумар дня на 16. мая 2025 р.

Приносиме вам сумар медияльной ґрупы ЛЕМ.фм+ на ден 16. мая 2025 р.

Выстартувал медженародный проєкт Fosterlang

1 мая тр. выстартувал проєкт Fosterlang (Підпора лінґвістичного капіталу: плян діяня для одверніня кризису ріжнорідности і активуваня социяльных корысти в Европі). Fosterlang то новый проєкт в рамках проґраму Горизонт Европа, котрого цілю єст зміцніня позициі меншыновых языків в Европі та іх охорона. Проєкт єст фінансуваный Европейском Комісийом і має на ціли спричынити трансформацийны зміны в підході до языкового і людского капіталу хоснувателів языків меншыновых соспільности і з досвідчыньом міґрациі в цілій Европі. Проєктове консорциюм обнимат 14 партнерскых інституций та 48 языковых соспільноси, што лучат знаня і досвідчыня в обшыри заанґажуваной і деколоніяльной лінґвістикы, языковой політикы, языковой ревітализациі, социяльной антрополоґіі, вельоязыковой едукациі і педаґоґікы, языкового плянуваня та технолоґічных інноваций. Проєкт Fosterlang буде обнимал порівнуючы баданя, опрацуваня моделів на основі порівнаня досліджынь припадків та пілотне вводжыня практичных розвязань. Проєкт зосереджат ся на розвитку языкового капіталу не лем з перспективы охороны языковой ріжнорідности, але і вказуючы, як хоснувателі языків можут сперати економічны, демоґрафічны, социяльны і здравотны аспекты людского капіталу. Лідером проєкту є Варшавскій Університет, партнерами м.ін. науковы єдиниці і інституты з Франциі, Іспаніі, Нідерляндів, Ірляндиі, Норвеґіі, Австриі ци Великой Британіі. З Польщы участ в проєкті берут Університет ім. А. Міцкєвича в Познані, Стоваришыня Вілямівяне, Ная Школа з Кашеб і Стоваришыня «Руска Бурса» в Ґорлицях.

Лемківскы упамятніня жертв явожняньского лаґру

Припоминаме, што уж заран, в суботу 17. мая в Явожні, з ініциятивы православного пароха з Крениці – о. Петра Пупчыка, пройдут упамятніня жертв явожняньского лаґру – Центрального Лаґру Працы Явожно, в якым, медже інчыма, вязнены і мучены были Лемкы. При лемківскым памятнику буде одслужена о 13.00 год. панахіда. Присутны будут делеґациі Лемків з гір і з заходу. Явожняньскій памятник был одкрытый в 2017 р. в рамках упамятнінь 70. річниці акциі «Вісла». Видно на ним інскрипцию в трьох языках, в лемківскым, польскым і анґлицкым, котра звучыт: «Вязненым і страдавшым / в лаґрі в Явожні / в наслідстві акциі «Вісла» Лемкам – Потомны. Лемківскє упамятніня жертв явожняньского лаґру поставлене было по долгых роках систематичного фальсифікуваня лемківской істориі, поменшаня лемківского терпліня і неспоминаня на Лемків – вязнів явожняньского лаґру двох тоталітаризмів. Поставліня памятника лемківской спільноты то в найвекшій мірі заслуга проф. Олены Дуць-Файфер і єй спілпрацы з локальныма властями.

Ден Дітины в Рускій Бурсі

Стоваришыня «Руска Бурса» в Ґорлицях просит до участи в Дню Дітины. Подія Ден Дітины в Рускій Бурсі одбуде ся в суботу 31. мая. А в єй рамках будут варштаты кропкуваня на лжыцях і лопатках та ріжны традицийны гры і забавы. Коло полудня, по пробі ансамблю Терочка, розпалиме огниско. Проєкт єст реализуваный завдякы дотациі Міністра Внутрішніх Справ і Адміністрациі. Красні просиме!