Сумар дня на 17. червця/юнія 2024 р.

Приносиме вам сумар медияльной ґрупы ЛЕМ.фм+ на ден 17. червця/юнія 2024 р.

Руска Бурса буде спілтворила проєкт #FOSTERLANG

Центр Заанґажуваных Досліджынь над Культуровым Тырваньом отримал консорцийный ґрант на проєкт ”Спераня языкового капіталу: плян діяня для одверніня кризы ріжнорідности і активуваня социяльных корысти в Европі” #FOSTERLANG. Центр єст лідером консорциі, яка складат ся з 13 партнерскых інституций, серед котрых єст і наше Стоваришыня Руска Бурса в Ґорлицях, а тіж Европейска Сіт Языковой Рівности та інституты, стоваришыня і університеты з Краю Басків, Каталоніі, Норвеґіі, Польщы, Ірляндиі, Шкоциі, Валиі і Каринтиі. З Польщы окрем Руской Бурсы долучыли до проєкту Універистет ім. Адама Міцкєвича в Познані, Стоваришыня Вілямівяне і кашебска Ная Школа. Цілю проєкту єст позитивна трансформация способів охороны, хоснуваня і промоциі меншыновых языків в Европі, в контексті социяльной динамікы, котра лучыт домінуючы і меншыновы языкы. В рамках проєкту будут розвинены діаґностичны нарядя для розпознаваня фактичной ситуациі меншыновых языків і вызвань іх хоснувателів. Выпрацуваны будут стратеґіі і пілотажовы ініциятивы направлены на охорону і зліпшыня социяльной і економічной ситуациі меншыновых соспільности. Найважнійшым результатом проєкту буде Дорогова Мапа Языкового Капіталу, котра помістит мериторичный спис рекомендаций для коротко-, середньо- і долготерміновых ефективных стратеґій спераня языковой ріжнорідности в Европі, а тіж охорона і шырока промоция вельоязычности.

Меншыновы выборы на Мадярах

В неділю 9. червця/юнія тр. на Мадярах вєдно з выборами до Европейского парляменту проходили і комунальны выборы в селах і містах, а так само і меншыновы выборы. Нацийональны меншыны выбрали в них представників своіх самосправувань на новый функцийный період. Голосували і Русины, як єдна з офіцияльно вызнаных нацийональных меншын. 5102 особы могли брати участ в меншыновых выборах, в котрых был выбераный склад Вседержавного русиньского самосправуваня, дві територияльны самосправуваня і вшыткы містны самосправуваня. Приголосило ся 3905 осіб. Змагали ся медже собом головно спискы Общества русиньской інтеліґенциі ім. Антония Годинкы, котре веде голова Світового Конґресу Русинів Штефан Лявинец, і Общества Русинів/Рутенів Мадяр. Лем в Будапешті были і кандидаты Русиньского кульртурного союзу. До выборів членів Вседержавного русиньского самосправуваня, як найвысшого самосправного орґану были приголошены два спискы. Общество Русинів/Рутенів Мадяр здобыло 11 мандатів, а 4 припали для Общества русиньской інтеліґенциі ім. Антония Годинкы. Веце про результаты выборів прочытате на нашым портали.

XXXIV Православне Поломництво на Святу Гору Явір

Братство Православной Молодежы Перемышльско-Ґорлицкой Єпархіі просит до участи в XXXIV Православным Поломництві на Святу Гору Явір, котре одбуде ся в днях 10.-12. червця/юнія з благословліня архієпископа перемышльского і ґорлицкого Паісия. Поломництво зачне ся в понедільок 10. липця/юлия о 9.00 год. од св. Літургіі при памятнику св. Максима і Жертв лаґру в Талергофі в Чорным. Дальше поломникы підут селами Долгє, Радоцина, Липна. Другого дня перейдут трасу зо Ждыні, через Реґєтів і Шквіртне до Ганчовы. В пятницю 12. липця/юлия празднуваня дня святых апостолів Петра і Павла поломникы зачнут од молебня в церкви в Ганчовій, а дальше перейдут до Высовой, де при церкви св. Архістратига Михала о 9.00 год. привитаны будут прибывшы єрархы. Пак вірны выйдут разом на святу Гору Явір, де о год. 10.00 буде служена Свята Літургія. Зголосити ся до участи в поломництві мож до Наталиі Урды, Фомы Болеха, о. Юлияна Феленчака або о. Ярослава Ґрича. Записы потырвают до суботы 6. липця/юлия.

Джерело фотоґрафіі: culturalcontinuity.al.uw.edu.pl