Сумар дня на 17. червця/юнія 2025 р.

Приносиме вам сумар медияльной ґрупы ЛЕМ.фм+ на ден 17. червця/юнія 2025 р.

«Звиджай погранича – з пасийом, здорово, роверово»

Проєкт «Звиджай погранича – з пасийом, здорово, роверово» зголошеный в рамках проґраму Interreg Polska-Słowacja отримал позитивну опінію і закваліфікувал ся до остатнього етапу процесу выборів проєктів. Внесок о дофінансуваня зложыл Ясельскій Повіт разом з ґміном Новый Змигород, ґміном Санкова та словацкым партнером Пряшівскым Самосправным Крайом. Єдным з головных пунктів проєкту єст модернізация Забыткового Парку в Новым Змигороді, котрый прийме форму проеколоґічного простору. Проєкт закладат тіж розбудову та ознкуваня роверовых і пішых трас трансграничного характеру. Новы пути получат ясельскій повіт, ґміну Санкова і ґміну Устя Рускє з бардиівскым окресом. В рамках проєкту по словацкій страні плянувана єст реализация роверовой трасы, котра буде доведена до Санктуариі в Габольтові. Цілю проєкту єст розвиток роверовой туристикы та промоция Низкого Бескіду як атракцийного напряму на активный одпочынок. Як проєкт отримат дофінансуваня, реализация зачне ся уж в жолтни/октобрі того рока і закінчыт до вересня/септембра 2027 р.

Камінярскы варштаты в Лопянці

Карпатскє Товариство просит до участи в камінярскых варштатах «Бывша штука будуваня без заправы». Подія пройде в рамках проєкту «Етноварштаты в Лопянці – едиция 3». Охочы будут мати нагоду пошырити своє знаня на тему камінярства. В проґрамі варштатів находит ся прелекция на тему типів каміня, што выступуєв  Бєщадах, способів позыскуваня та представліня основных принципів обрабляня. Теоретична част буде підперта примірами камінярскых реліктів захованых в Лопянці. Участникы познают штуку лучыня каміня без заправы та самы будут мочы спрібуваты той технікы будовы муру. Варштаты пройдут в днях 28.-30. червця/юнія і сут дармовы, участ можут взяти лем полнолітні охочы. Обовязує скорша реґістрация. Дрібниці находят ся на сайті Карпатского Товариства.

Малопольскы вінкы

В найблизшу суботу, 21. червця/юнія пройде єдна з найпопулярнійшых в ґорлицкым повіті подій – Малопольскы вінкы. Буде то уж VIII едиция стрічы, яка посвячена єст традициі собіток. Так як і в попередніх роках, подія пройде в пленері, в Скансені Погіряньского Села в Шымбарку і зачне ся о 15.00 год. Орґанізаторы Малопольскых вінків зрыхтували для участників ріжного рода конкурсы і варштаты, a o артистичну част собіткы задбают члены локальных ансамблів. На конец дня буде нагода принимати участ в традицийных собітковых обрядах при ватрі і пущаню віночків по воді. Почестный патронат над подійом тримат Маршалок Малопольского Воєвідства Лукаш Смулка.

Анджей Жыґадло і Томаш Падло будут опроваджали в Кракові по своіх выставах

Етноґрафічный Музей ім. Северина Удзєлі в Кракові разом з Музейом Модерной Штукы (MOCAK) просят на неділю 29. червця/юнія на спільне опроваджаня по двох выставах: «Транслокациі святынь в Польщы» і з образами Анджея Жыґадла. По експозициі в Етноґрафічынм Музею опроваджал буде Томаш Падло, куратор выставы і автор презентуваных фотоґрафій, в Музею Модерной Штукы о выставі оповіст автор творів Анджей Жыґадло. Презентуваны на обох выставах працы сут міцно звязаны з сакральном стрефом. Вказуют костелы або церкви, котры были збурены ци перенесены в інче місце. Артисты в зосередят ся на обєктах походячых з Кресів – спільной обшыри обох выстав.