Сумар дня на 17. грудня/децембра 2024 р.

Приносиме вам сумар медияльной ґрупы ЛЕМ.фм+ на ден 17. грудня/децембра 2024 р.

Перогы, колады і гуцульцкє колядуваня- просиме на велийну стрічу до Руской Бурсы

Стоваришыня «Руска Бурса» в Ґорлицях просит на послідню того рока подію – велийну стрічу. Буде она получыньом традициі з жывом культуром – так лемківском, як і гуцульском. Стріча пройде в найблизшу суботу 21. грудня/децембра і зачне ся о 15.00 год. од доповіди др Юстины Чонсткы-Клапиты, знаной етномузиколожкы і антроположкы культуры з Ягайлоньского Університету, авторкы выдатной моноґрафіі «Колядуваня на Гуцульщыні». Прелекция приближыт музичны та соспільны аспекты колядуваня, вкаже, як вельовіковы звыкы фурт влияют на достоменніст локальных соспільности. Вечер прикрасит выступ дітячого ансамблю Терочка, котрый запрезентує традицийны лемківскы коляды, а по артистичній части подіі буде мож покоштувати лемківскы велийны стравы. Вступне на подію дармо, доповід буде выголошена в польскым языку.

Рік 2025 буде для ґміны Санкова проінвестицийным роком

Ґміна Санкова приняла уж буджет на 2025 рік. Радны схвалили тіж і Многолітню Фінансову Проґнозу на рокы 2025-2034. Найбільша част буджету в будучым році перезначена єст на інвестициі, а найбільшом заплянуваном задачом єст побудуваня крытого басену в Санковій разом з обєктами водной рекреациі та заґарантуваня електричного засиланя і тепла до басеновых обєктів. На тоту ціль Ґміна рішыла передати понад 16 млн зл, з чого понад половина то дофінансуваня з урядовых середків. Дальшы інвестициі, котры будут реализуваны протягом 2025 рока, то розбудова водно-канализацийной і дороговой інфраструктуры та модернізация уличного освітліня в ріжных селах на обшыри ґміны. В буджеті забезпеченых єст тіж понад мілийон злотых на реализацию інвестицийных задач в парохіях. Роботы будут ведены при церквах і костелах в Санковій, Мацині Великій, Маластові, Кривій, Панкній, Рыхвалді, ци на цмонтери в Бортным. В 2025 році Ґміна буде тіж продолжала над проєктовом документацийом про будову водно-канализацийной сіти в дальшых селах і будову ходників при воєвідскых і повітовых дорогах.

В минулым тыжны прошло перше засіданя Бєщадского Звязку Повітів і Ґмін Погранича

Бєщадскій Звязок Повітів і Ґмін Погранича буде полнил ролю координатора самоурядовых діянь, зосередит ся на реализациі інвестиций тыкаючых інфраструктуры, охороны середовиска, розвитку туристикы та підтримуваню локальных ініциятив. В скалд звязку входят м.ін. ґміны Ліско, Команча, Тирава Волошска, Тисна, Лютовиска та бєщадскій, ліскій і саноцкій повіты. В часі першой стрічы присутны покликали заряд та зачали бесіды на тему актуальных проблемів. Дискутували про розбудову і модернізацию дороговой інфраструктуры ци збільшаюче ся чысло драпіжників і звязаны з тым консеквенциі. Звязок ставлят на спілпрацу самоурядів, котра принесе хосен жытелям Бєщадів і Погранича, а тіж туристам.

Оддай кров і одбер яличку на свята

Клюб Гоноровых Давців Кырви «Leśnik» разом з Надлісництвом Ґорлиці просят до участи в акциі оддаваня кырви під гослом «Яличка для жытя». Подія пройде 18. грудня/децембра в Реґіональным Центрі Донорства Кырви в Ґорлицях в годинах од 8.00 до 12.00. Каждый, хто того дня оддаст кров, буде міг рахувати на подарок од лісничых, якым буде яличка на свята. Акция має на ціли заохочыня жытелів ґорлицкого повіту до оддаваня кырви та особливе підкрислиня, як цінным дарунком єст кров, котра може вратуваты жытя.