Сумар дня на 14. вересня/септембра 2026 р.

Приносиме вам сумар медияльной ґрупы ЛЕМ.фм+ на ден 14. вересня/септембра 2026 р.

В Ладомирові одкрыли памятну таблицю Антонийови Годинкови

В селі Ладомиров, Сниньского окресу, в суботу 12. вересня/септембра тр. зышли ся представителі Мадярів і Русинів, жебы оддати чест Антонийови Годинкови. В тот ден з ініциятивы Академічной рады Мадярів на Словакциі в співпраци з Сельскым урядом в Ладомирові была на будинку уряду одкрыта памятна таблиця тому вызначному родакови, кєдже тот рік в липци/юлию припомянули сме собі 80 років од його смерти. Таблиця є триязычна – має текст по словацкы, по русиньскы і по мадярскы. В святочній подіі взяли участ многы вызначны представникы обох народів. За Русинів были присутны делеґациі зо Словациі і Мадяр. Гості пришли так само з Підкарпатя. Святочна лавдация перед одкрытьом таблиці была прочытана в русиньскым і мадярьскым языку. Участны могли ся з нєй дознати о жывоті і творчости того вызначного русиньского історика, лінґвісты, фоклористы, педаґоґа, котрый стал ректором університету в місті Печ, а так само был наперед членом-кореспондентом, а пізнійше рядным членом Мадярской академіі наук. Підчас ІІ світовой войны мал і посаду честного председы Підкарпатского общества наук. Участны могли тіж почути, же Антоній Годинка был першым кваліфікуваным вченым, котрый занимал ся історийом Русинів. Веце на тоту тему прочытате в дописі на нашым портали.

Вертат тема західньой обводниці Ґорлиц

В минулым тыжни Рада Міста Ґорлиці вернула до темы західньой обводниці міста. Заступця бургомайстра представил радным інформациі зо стріч з Зарядом Воєвідскіх Доріг і проєктантами. Іщы в липци/юлию одбыла ся стріча тыкаюча вельовариянтовой концепциі проєкту західньой обводниці Ґорлиц. Брали в ній участ проєктанты і представникы самоурядів міста Ґорлиці, ґміны Ґорлиці і ґміны Санкова. Бесіды тыкали предовшыткым выпрацуваня можливых моделів трасы західьой обводниці. Єдным з цілів єст найти розвязаня, котре спричыняло бы як найменшый спротив жытелів. Заряд Воєвідскых Доріг вызначыл проєктантам час на опрацуваня барже детальных вариянтів. Для самоурядів справа має великє значыня, з огляду на штоденны комунікацийны проблемы і потребу выведіня части руху поза центр міста.

4. Лемківскє Співаня в Высокым

В найблизшу суботу 19. вересня/септембра в селі Высокє в ґміні Рудна одбуде ся 4. Лемківскє Співаня. Подія зачне ся о 14.00 год. Перед концертом ансамблі перейдут в святочным короводі. Выступлят: Лемківскій Ансамбль Пісні і Танця Кычера, Лемчата, Лемківскій Фольклорный Ансамбль Розтока, Захента з Зимной Воды, Фольклорный Ансамбль Сасанка, Оркєстра Святого Миколая, Коняре і Демай. В рамках додаткового проґраму зрыхтувано простір штукы, варштаты і зону для діти.

Ближыт ся ХХХIV Лемкiвска Творча Осiн

Припоминаме, што уж в найблизшый вікенд 19.-20. вересня/септембра проходила буде ХХХIV Лемкiвска Творча Осiн. Тогорічна едиция посвячена буде памяти Федора Кузяка, в 100. річницю його народжыня. Першый ден подii одбуде ся в Бортным – рідным селі маляря, байкаря і соспільного діяча. Початок той части о 17.00 год. в в сельскій світлици. В другiй ден стрiтиме ся – традицийно – в Ґорлицях, в Рускій Бурсі. Недільна част зачне ся о 16.00 год. До участи запрошены сут творці слова з Польщы і Словациі. В артистичній части запрезентуют ся: Ансамбль Терочка і Тімотей Федор з Марийом Марілловом, а тіж Народна Капеля Роберта Гарчара. Головным орґанізатором подіі єст Стоваришыня Лемків, спілорґанізатором – Стоваришыня «Руска Бурса» в Ґорлицях. Сердечно просиме.