Сумар дня на 17. лютого/фебруара 2021 р.

Приносиме вам сумар медияльной ґрупы ЛЕМ.фм+ на ден 17. лютого/фебруара 2021 р.

Карпатска Стратеґія жде на зелене світло од Европейской Рады

10. лютого/фебруара прошло перше тр. засіданя Медженародной Ґрупы «Карпаты» Европейского Комітету Реґіонів, котрой членом є маршалок малопольского воєвідства Вітольд Козловскій. Орґанізатором стрічы был маршалок підкарпатского воєвідства Владислав Ортиль. Присутны были і представникы реґіональных власти з Чех, Словациі, Украіны і Румуніі. Бесідували о Карпатскій Стратеґіі, котра в заміріню має быти пятом макрореґіональном европейском стратеґійом. Єй цілю буде реализация спільных проєктів в обшыри транспорту, охороны середовиска, здоровля, культуры і туристикы та вырівнуваня цивілизацийных ріжниц і поглубленый діалоґ держав Серединной Европы. Представник Европейской Комісиі Джан-Пєр Халькін спостерюг, што проєкт Карпатской Стратеґіі є добрі зрыхтуваный і што Европейска Комісия жде тепер на сиґнал од Европейской Рады, жебы підняти працы, што зреализуют принятя пятой медженародной стратеґіі.

Як Полковичане видят своє місто і ґміну?

До 4. марця жытелі Польковиц можут выполнити анонімову анкєту про будучніст міста і ґміны. Одповіди на звіданя: як повинны розвивати ся Польковиці?, што повинно змінити ся в ґміні протягом десятьох найблизшых років?, та інчы увагы і коментарі жытелів будут підповідю при опрацовуваню двох стратеґій: розвитку ґміны на рокы 2021-2030 та рішаня соспільных проблемів. Заступця бургомайстра до соспільных справ Ева Ковалик закликує, жебы передумати своі одповіди, так штобы анкєта была порядным джерелом інформаций про актуальный стан ріжных обшыри в ґміні, помогла діаґнозувати проблемы і опрацувати напрямы діянь. З огляду на епідемію анкєту мож выполнити выключні в електронній формі.

Одышол Михаіл Град, діяч серед Русинів на Підкарпатскій Руси

Перед двома днями вмер русиньскій писатель, поета і публициста, голова Союзу Русиньскых Писателів Закарпатя Михаіл Град. Вмер в віку 70 років. Михаіл Град вродил ся в Березові. По професиі был інжынєром та учытельом. Робил тіж як волонтер в Червеным Кресті, шоферувал. В Тячові основал районне Общество Підкарпатскых Русинів, дві русиньскы недільны школы і районну молодіжну орґанізацию імени Александра Духновича. Написал книжкы по росийскы, украіньскы і русиньскы, в котрых є істория, поезия і співанкы Русинів. В 2018 р. Медженародный Фонд «Русская премия» выголосил го за лавреата нагороды за великій вклад до розвитку русиньской літературы.

Конкурс зосередженый на селі

Фундация для Розвитку Польского Рільництва оголосила конкурс, котрого цілю є промувати рільництво в Польщы, зосередити ся на проблемах звязаных з сельскыма обшырями, промувати культурову спадковину та збогатити публичну дебату про село. В рамках конкурсу капітула оцінит працы в двох катеґориях: науковы або популярнонауковы роботы та працы презентуючы культуровый доробок державы, реґіону, описуючы локальны ініциятивы, історичну спадковину сел ци приміры успіхів в розвитку села. Найліпша праца отримат нагороду высокости 5 тис. зл, в обох катеґориях. Выріжнены роботы будут печатаны в книжковій формі в Науковым Выдавництві Scholar. Термін присыланя робіт то 31. липця/юлия тр.

Фот. www.malopolska.pl