Сумар дня на 17. лютого/фебруара 2022 р.

Приносиме вам сумар медияльной ґрупы ЛЕМ.фм+ на ден 17. лютого/фебруара 2022 р.

Лемківскій Річник 2021

Інформуєме, што під конец 2021 р. явил ся «Лемківскій Річник» 2021, періодик выдаваный Стоваришыньом Лемків. В публикациі находят ся дописы посвячены так округлым річницям, як і мало дослідженым темам. Петро Козміньскій, бывшый студент лемківской філолоґіі, написал статю до 110. річниці выданя часопису «Лемко». Андрий Копча продолжат своє оповіданя про історию Лемківской Ватры в Михалові. Ведучый Стоваришыня Лемків пише тіж о 30. річници Світовых Конґресів Русинів. Анна Кырпан оповідат о істориі і специфіці лемківской різбы і різбярів. Даміян Новак презентує польскоязычный допис про історию чарняньской церкви. В части посвяченій людям, Маестро Ярослав Трохановскій одкрыват нам біоґрафію выдатного довоєнного народного гудака, Прокопа Сливы з Королевы Руской. Редактор выданя Севериян Косовскій окрем вводного слова написал до 130. річниці народжыня Теофіля Куриллы і ювілейну статю на 70-літя народжыня Стефаніі Трохановской. Книжку можете придбати в інтернетовым склепі Стоваришыня Лемків або контактуючы ся з шефредактором выданя майльово: seweryjan@lem.fm.

Крениця буде мала новый «світовый» амфітеатр

Неодолга під Парковом Гором в Креници зачне ся будова важной для розвитку курорту інвестициі. Афмітеатр побудуют при ул. Никыфора Креницкого, близко нижньой стациі колейкы на Паркову Гору. Має мати задашену сцену з простором 100 квадратных метрів і тисяч сідячых місц для публикы. Проєкт навязує до Opera House в Сидней, а задашена част – до креницкых віллі при Бульварах Дітля. О вознесіню задашеного амфітеатру бесідували в місті уж од років. Головні з огляду на брак концертовой салі потрібной хоц бы для Фестівалю Яна Кєпуры. Середкы на побудуваня аміфтеатру, близко 10 млн зл, походят з проґраму Польскій Лад. На тот момент власти ждут на консерваторскє рішыня і позволіня на будову. В заміріню буде то постійне місце, де будут орґанізувати вшыткы культурны подіі в терміні од мая до жолтня/октобра. Амфітератр буде чыслил 1000 місц, з чого 300 місц і сцена будут під дахом.

Варшавска стріча з Антонийом Крогом

Нацийональный Етноґрафічный Музей в Варшаві просит в неділю, 27. лютого/фебруара, на стрічу з Антонийом Крогом, етноґрафом і писательом. Подія зачне ся о 16.00 год. Буде она товаришыла фінісажови двох часовых выстав, в тым єдній посвяченій Никыфорови. Стрічу з Антонийом Крогом вюл буде Роберт Зыдель, директор Музею. Крог то польскій етноґраф і дослідник, якій більшу част жытя посвятил і досліджаню обшыри Лемковины. Написал пару книжок, якы односят ся і до лемківской темы. Гостил в Рускій Бурсі в Ґорлицях. Трансмісия стрічы буде онляйн в сіти Facebook на файнпейджы Музею.

Высвятили одновленый собор в Мішкольци

Грекокатолицкій катедральный собор Успіня Пресвятой Богородиці в Мішкольци перешол реконструкцию свого інтерєру. Одновленый обєкт был высвяченый такой перед місяцьом, 23. січня/януара. Найбарже видным елементом одновленого інтерєру сут 72 іконы розписаны на стінах церкви. Сут зроблены в поствізантийскым стилю. Церков посвятили всітри владыкы Грекокатолицкой Церкви на Мадярах – владыка Филип Кочіш, єпарха Авель Сочка і владыка Атаназ Орос. Служыл тіж емеритуваный єпископ Сілярд Керестеш. Ремонт церкви підпорили фінансово мадярскы власти. В торжестві брало участ семох римокатолицкых єпископів і єден реформуваный владыка. Окрем розпису ікон одновлены были і електроінсталяциі, світла, модернізували озвучыня, замонтували огріваня під підлогом. Церков є катедральным собором Мішкольцской Грекокатолицкой Єпархіі. Будову зачали в 1902 р., докінчыли єй десят років пізнійше.