Сумар дня на 18. мая 2022 р.

Приносиме вам сумар медияльной ґрупы ЛЕМ.фм+ на ден 17. мая 2022 р.

Презентация русиньской культуры в курортій Креници

Уж о два дни, в пятницю – 20. мая, одкрыте буде ХІ Медженародне Бієнале Лемківской/Русиньской Культуры, інформуют о тым Стоваришыня Лемків і Світова Рада Русинів – головны орґанізаторы подіі. Орґанізувана што два рокы стріча Русинів з ріжных держав Европы і ЗША то нагода на промоцию русиньской культуры, выміну опіній і поглядів, але і нагода близше познати Лемковину, єй люди і звыкы. Концерты попереджены будут, традицийні, панахідом на гробі Епіфана Дровняка, пак зложыньом квітя при памятнику маляря. В пятницю переданы будут і дві цінны русиньскы нагороды – премія ім. Василя Турока-Гетеша признавана для вызначных діячів та нагорода Pro Arte Ruthenorum, яка належна є найліпшым русиньскым творцям культуры. Субота буде посвячена дискусиям і выміні поглядів. В тот ден одбуде ся і засіданя Світовой Рады Русинів. ХІ Бієнале закрыє третій концерт. Вшыткы концерты будут проходити в Старым Здройовым Дому.

Єдніст церкви

В понедільок, 16. мая, Святый Собір Єпископів Сербской Православной Церкви привернул канонічну і літургічну лучніст з Македоньском Православном Церквом – Архієпископством Охриды. Патріарха Варфоломій узнал Македоньску Православну Церков під офіцийным назвазньом Охридского Архієпископства, без однесіня до самой Македоніі. Екуменічный Партіархат оголосил, што принимат до євхаристичного причастя «єрархію, духовенство і вірных той Церкви під ведіньом архієпископа Штефана». Справа автокефалиі Македоньской Православной Церкви, котру тота самовільно оголосила в 1967 р., унезалежняючы ся од Сербского Патріархату, тырват од тамтого часу. До кінця не была узнана зо страны інчых незалежных Православных Церкви, котру принимали ю за схізматицку. Не были правлены спільны богослужыня, не были тіж узнаваны одправляны гын святы тайны. Ситуация змінила ся по Святым Синоді, котрый прошол 9. мая і в час котрого дрібницьово омовили тоту справу. Од того дня узнано канонічный статус Архієпископства Охриды.

Обводния долином Попраду єднак буде

Помимо протестів мешканців, Ґенеральна Дирекция Державных Доріг і Автострад не резиґнує з пляну будовы обводниці Пивничной. До бургомайстра курорту трафил внесок выдати середовискове рішыня для інвестициі. Противникы боят ся, што модернізация переізду приведе в долину Попраду тяжкы авта в дорозі на Словацию і полудне Европы. Будова обводниці Пивничной то част векшого пляну, котрый обнимат модернізацию парох фраґментів державной дорогы но 87, што веде до граничного переходу в Мнишку н. Попрадом. Обводниця Пивничной є взята до увагы в урядовым пляні 100 обводниц на 100-літя незалежности, што означат, же має заґарантуване фінансуваня. Кошт перебудовы рахуваный є на 360 млн зл.

По хыжах буде ходил проєктант

Війт Ґміны Санкова подал до публичной інформациі віст, што на обшыри ґміны, а конкретні в самій Санковій і Мацині Малій, буде реализувана задача перебудовы ґазовой сіти і в звязку з тым до жытелів Санковой і Мацины Малой буде в найблизшых тыжнях приходил працівник проєктового бюра JR PROJEKT з Замостя Марек Папроцкій, жебы рішыти дрібниці звязаны з перебудовом ґазопроводу.