Сумар дня на 23. вересня/септембра 2026 р.

Приносиме вам сумар медияльной ґрупы ЛЕМ.фм+ на ден 23. вересня/септембра 2026 р.

Одбыло ся 93. засіданя Спільной Комісиі Уряду та Нацийональных і Етнічных Меншын

Вчера проходило 93. засіданя Спільной Комісиі Уряду та Нацийональных і Етнічных Меншын. Єдном з головных тем стрічы был поділ дотаций на діяня, котрых цілю є охорона і розвиток культурной достоменности меншын і хоснувателів реґіонального языка. Члены комісиі бесідували тіж о середках заплянуваных на тоту ціль в проєкті буджету державы на 2027 рік. Бесідувано о ситуациі меншын в контексті насиляючых ся в публичным просторі порявів ксенофобіі і квестийонуваня громадяньскых прав осіб з меншыны. В дальшій части презентувано діяльніст бадавчых інститутів, котры занимают ся темамы меншын, а тіж омовлено роботы, што сут ведены над новелизацийом уставы о нацийональных і етнічных меншынах і о реґіональным языку.

«Співанкы нашой мамкы» Каткы Романяковой і Марты Жаговой та «Маковы приповідкы» Людмилы Шандальовой доцінены

Оголошены были результаты літературно-чытательского конкурсу Книга Рока Пряшвіского Самосправного Краю. До девятой едициі конкурсу зголошеных было 80 публикаций. О лавереатах конкурсу рішало жырі, а окремо могли голосувати тіж інтернавты. Книжкы были оцінены в пятьох катеґориях, в тым в катеґориі Украіньска і русиньска література, до котрой мож зголошувати книжкы раз на два рокы. До той едициі зголошеных было 10 публикаций, што были выданы в 2024 і 2025 році. Жырі признала два першы і єдно третє місце. Найвысше оцінено публикацию пн. «Співанкы нашой мамкы» Каткы Романяковой і Марты Жаговой, а так само і по украіньскы написану книжку «Кам´яний потік», которой автором є Юлиюс Панько. На третім місци нашла ся русиньска авторка Людмила Шандальова з книжком для наймолодшых – «Маковы приповідкы». Тота ілюструвана книжка нашла ся іщы на першым місци в онляйновым голосуваню чытачів. Вшыткы книжкы буде мож обзерати на принагідній выставі презентуваній в Крайскій Бібліотеці Павла Орсаґа Гвієздослава в Пряшові, а пак в наступных реґіональных бібліотеках.

Хто хоче записати ся на курс языка?

Соспільно-культурный сайт Фай по свому поінформувал, што зберают охочых до наукы лемківского языка. Заплянуваных єст пят онляйново веденых лекций протягом пятьох тыжнів. Занятя ведены будут ґрупах по пят осіб, розділеных подля заавансуваня знаня языка і потреб. В рамках курсу каждый з участників отримат материялы до роботы на занятях і самодільной наукы дома, а тіж підпертя учытеля протягом цілого курсу. Участ в курсі буде безплатна. Занятя ведут Оксана Грабан-Ліхтаньска та Бартломєй Ліхтаньскій. Формуляр найдете на сайті lemkowski.online.

Ґаля Малопольского Лідера Социяльной Економіі 2026

Місто Ґорлиці остало фіналистом конкурсу Малопольскій Лідер Социяльной Економіі 2026 в катеґориі Самоуряд Приязный Социяльній Економіі. Торжественне вручыня нагорід прошло 15. вересня/септембра в Кракові підчас Малопольской Ґалі Лідерів Социяльной Економіі і Социяльной Політикы. Місто репрезентувал бургомайстер Рафал Кукля. Был то дорічный конкурс, в рамках котрого нагороджуваны сут орґанізациі і інституциі, што споюют господарчу діяльніст з социальном місийом. Званя Малопольского Лідера Социяльной Економіі 2026 отримала Социяльна Кооператива Альберт. Орґанізатором подіі был Самоуряд Малопольского Воєвідства – Реґіональный Осередок Социяльной Політикы в Кракові.