Сумар дня на 17. серпня/авґуста 2021 р.

Приносиме вам сумар медияльной ґрупы ЛЕМ.фм+ на ден 17. серпня/авґуста 2021 р.

Іщы лем дeн до початку єдного з найбільшых фольклористичных фестівалів в Польщы

Медженародный Фестіваль «Світ під Кычером» одкрытый буде 19. серпня/авґуста і потырват аж 10 дни. Окрем головного ансамблю Кычера на сцені запрезентуют ся артисты з Росиі, Сербіі, Словациі, Румуніі, Молдавіі і Тайляндиі. Подія поділена єст на дві части, єдна пройде в Малопольщы, а друга на Нижнім Шлеску. Для першой головным осередком єст Крениця зо сценом на дептаку, але як мож прочытати на сайті фестівалю – ансамблі запрезентуют ся тіж в інчых селах Низкого і Сандецкого Бескідів. Друга част акциі пройде в такых містах як Ліґниця, Свидниця, Лісєц, Хоцянів ци Рудна. Додатково на єден ден імпреза перенесе ся на Словацию до Курова. Гармоноґрам тогорічной едициі фестівалю находит ся на фейсбуковым сайті лемківского ансамблю Кычера.

В Устю Рускым будут ремонтувати міст, што з обіздом?

Онедолга зачне ся ремонт єдного з устяньскых мостів, котрый находит ся на трасі з Ґладышова до Устя Руского, над ріком Ждынянком. Зато вызначены были два обізды, єден через Шквіртне і Ганчову, другій через Кункову, Лося і Климківку. Не сподабало ся тото жытелям ґміны, котры своє незадоволіня вказали зобраньом ся при мості. В страйку участ взяли тіж представникы рады ґміны. Як повіла для телевізиі RTV Gorlice ведуча рады ґміны Устя Рускє Йолянта Добек, введены обізды сут за долгы. Мешканці хотят, жебы так як при попередніх інвестициях обізд поведено при ремонтуваным мості, через ріку, што значучо скоротит дорогу в порівнаню до вызначеных обіздів. Арґументом сут напр. амбулянсы, котры мусіли бы доіхати до хворых, як і долга дорога до школы для молодежы, котра уж о два тыжні зачне шкільный рік. Голос в тій справі забрал тіж війт ґміны Збіґнєв Людвін, котрый переказал, же зачне бесіды зо староством і буде ся старал, жебы обізд зрыхтувано на ріці. Інвестицию фінансує Ґорлицкій Повіт при підпорі Ґміны Устя Рускє.

«Ярмак св. Йоана ІІ» – і Ти можеш запрезентувати своі творы 

Ґміна Зборів просит ремісників, народных творців і кружкы заінтересувань до участи в інтернетовым «Ярмаку св. Йоана ІІ». Імпреза пройде 5. вересня/септембра в Дому Культуры. Запрошыня направлене єст на артистів і орґанізациі, котры занимают ся підтримуваньом давных традиций. Охочы будут мати нагоду запрезентувати своі творы і знаня на трансграничній обшыри. Треба выполнити зголошыня, котре мож найти на сайті ґміны Ропа, і переслати го до пятниці, 25. серпня/авґуста, почтом або майльом. З ярмаку ведена буде трансмісия, котру мож буде обзерати на інтернетовій плятформі YouTube і інчых порталях повязаных з ярмаком.

Колекта на печатаня першой лемківской кухарской книжкы дале тырват

Припоминаме, што до кінця серпня/авґуста тр. тырват соспільна колекта на печатаня першой лемківской кухарской книжкы. В публикациі найде ся яж 70 провіреных ориґінальных рецептур. Каждый, хто хоче мати примірник книжкы, може зробити передплату в соспільній кампаніі збераня грошы на выпродукуваня книжкы на сайті zrzutka.pl. Колекту глядайте під назвом: Łemkowskie smaki – wydanie książki kucharskiej.