Сумар дня на 10. вересня/септембра 2026 р.

Приносиме вам сумар медияльной ґрупы ЛЕМ.фм+ на ден 10. вересня/септембра 2026 р.

Вмер Валентин Козменко-Делінде

Як поінформивал Театр Александра Духновича, в середу 9. вересня/септембра вмер Валентин Козменко-Делінде. Театральный режысер, автор сценічных драматизаций, костюмоґраф і высокошкольскій педаґоґ украіньского походжыня підписал ся і під парома інсценізациями Театру Александра Духновича в Пряшові. Як раз тепер был в процесі рыхтуваня новой пєсы в русиньскым театрі, котра мала заплянувану премєру на конец жолтня/октобра. Народил ся Валентин Козменко-Делінде 25. січня/януара 1951 р. в кыівскій области, в товдышній совітскій Украіні. Театральну режысерию завершыл на Кыівскым Нацийональным Університеті Театру, Кіна і Телевізиі ім. Івана Карпенка-Карого. По тым, як ся перебрал жыти на Словациі, як режысер спілпрацувал з вельома театрами. Пєсы, котры з драматичныма колективами зробил, мож было видіти в Театрі Духновича. Женом його была Людмила Лукачыкова, яка днес є артистичном шефовом драматичного колективу в русиньскым театрі. Вічная Памят!

Вертат Ретро Потяг

На желізницьовых стациях в Ґорлицях і Бічы зас вкаже ся Ретро Потяг. Забытковый желізницьовый табір выіхат з Біча 27. вересня/септембра о год. 12.44 і в місті світла буде о 13.13, назад до Біча одыйде о 14.00 год. Подорож Ретро Потягом то можливіст перевезти ся забытковыма ваґонами з 30. і 60. років XX. Білеты на атракцию мож зарезервувати на сайті Малопольскых Пути Желізницьовой Туристикы. На участників будут чекати додатковы атракциі, а то м.ім. участ аніматорів в історичных облечынях зо зламу ХІХ і ХХ ст., участ музичного ансамблю ци можливіст скорыстати з барового ваґону.

Неодолга Лемківска Творча Осін

В днях 19.-20. вересня/септембра проходила буде ХХХIV Лемкiвска Творча Осiн. Тогорічна едиция посвячена буде памяти Федора Кузяка, в 100. річницю його народжыня. Вчера головный орґанізатор подіі – Стоваришыня Лемків – подал до відома плякат. Першый ден подii одбуде ся в Бортным – рідным селі маляря, байкаря і соспільного діяча. Початок той части о 17.00 год. в в сельскій світлици. В другiй ден стрiтиме ся – традицийно – в Ґорлицях в Рускій Бурсі. Недільна част зачне ся о 16.00 год. До участи запрошены были творці слова з Польщы і Словациі. Спілорґанізатором подіі є Стоваришыня «Руска Бурса» в Ґорлицях.

Ювілей 500 – літя Репеди

В найблизшу суботу, 12. вересня/септембра обуде ся святкуваня ювілею 500 років Репеди, што ся находит на східній Лемковині. Проґрам зачне ся о 11.00 год. Божеском Літургійом в в грекокатолицкій церкви св. Миколая, яку очелит митрополита Євген (Попович), архієпископ перемышльско-варшавской архієпархіі. В тым часі буде посвячена і памяткова таблиця з нагоды 200. річниці будовы храму. Будут тіж одкрыты лавкы памяти і дерева – липы памяти. O 14.00 год. зачне ся офіцийне привитаня гости на стадийоні в Репеди. В артистичній части выступит пару ансамблів, м.ін. ЛемМы і Ославяне. Передвиджено вельо додатковых атракций для діти і дорослых.